കൊച്ചി: പറവൂരിൽ ജോലിക്കാരിയായി നിന്നിരുന്ന വീട്ടിൽ നിന്ന് 15 പവൻ സ്വർണം മോഷ്ടിച്ച കേസിൽ വീട്ടുജോലിക്കാരിയെ പോലീസ് അറസ്റ്റ് ചെയ്തു. കൈതാരം പൊട്ടന്റെപറമ്പിൽ വീട്ടിൽ ശ്രീജ (47)യെയാണ് പറവൂർ പോലീസ് പിടികൂടിയത്.

കോട്ടുവള്ളി കൈതാരം ശ്രീമുരളി വീട്ടിൽ ശ്രീദേവി അമ്മയുടെ വീട്ടിലെ അലമാരയിലെ ലോക്കറിൽ സൂക്ഷിച്ചിരുന്ന 15 പവൻ സ്വർണാഭരണങ്ങളാണ് മോഷണം പോയത്. കഴിഞ്ഞ ദിവസമാണ് ലോക്കറിൽ നിന്ന് ആഭരണങ്ങൾ നഷ്ടമായ വിവരം വീട്ടുകാർ ശ്രദ്ധയിൽപ്പെട്ടത്. ലോക്കറിന്റെ പൂട്ട് തുറന്നാണ് മോഷണം നടത്തിയതെന്ന് പോലീസ് അറിയിച്ചു.

ശ്രീദേവി അമ്മയുടെ പരാതിയിൽ അന്വേഷണം ആരംഭിച്ച പോലീസ് ശ്രീജയെ ചോദ്യം ചെയ്തപ്പോൾ കുറ്റം സമ്മതിച്ചതായാണ് വിവരം. മോഷ്ടിച്ച സ്വർണം പണയംവെച്ചതായും അന്വേഷണത്തിൽ കണ്ടെത്തി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.