പാലക്കാട്: ഗുരുവായൂര് ക്ഷേത്ര ദര്ശനത്തിന് പോയ വയോധികരായ സഹോദരിമാരെ കാണാനില്ലെന്ന് പരാതി. പാലക്കാട് ചാലിശ്ശേരി സ്വദേശികളായ ശാന്ത (68), അമ്മിണി (76) എന്നിവരെയാണ് കാണാതായത്. ഞായറാഴ്ചയാണ് ഇവര് ഗുരുവായൂര് ക്ഷേത്ര ദര്ശനത്തിന് പോയതെന്നാണ് വിവരം. രണ്ട് പേരുടെയും മൊബൈല് ഫോണ് വീട്ടില് വെച്ചാണ് ക്ഷേത്ര ദര്ശനത്തിനായി പോയത്. ഇരുവര്ക്കുമായി തെരച്ചില് ഊര്ജിതമാക്കിയിട്ടുണ്ടെന്ന് പൊലീസ് അറിയിച്ചു.
വൈകിട്ടായിട്ടും തിരിച്ച് എത്താതെ വന്നതോടെയാണ് കുടുംബം പൊലീസിനെ സമീപിച്ചത്. സിസിടിവി കേന്ദ്രീകരിച്ച് നടത്തിയ പരിശോധനയില് ഇരുവരും ഞായറാഴ്ച വൈകീട്ട് പാലക്കാട് കെഎസ്ആര്ടിസി ബസ് സ്റ്റാന്റില് എത്തിയെന്ന് കണ്ടെത്തി. ബസ് ഡ്രൈവറോട് തിരുപ്പതിക്ക് എപ്പോഴാണ് ബസെന്ന് അന്വേഷിച്ചതായി പൊലീസിന് വിവരം ലഭിച്ചിട്ടുണ്ട്. ഞായറാഴ്ച വൈകീട്ട് തന്നെ ഇരുവരും പാലക്കാട് നിന്ന് ബസ് കയറി. കോയമ്പത്തൂരിലേക്കോ മധുരയിലേക്കോ പോയിരിക്കാമെന്ന സാധ്യതയാണ് പൊലീസ് പരിശോധിക്കുന്നത്.
