ന്യൂഡല്ഹി: പഹല്ഗാം ഭീകരാക്രമണത്തില് പാകിസ്താന് ബന്ധം വ്യക്തമായതായി എന്ഐഎ. ഭീകരാക്രമണത്തില് പാകിസ്താന് ചാര സംഘടനയായ ഐഎസ്ഐ (ഇന്റര് സര്വീസസ് ഇന്റലിജന്സ്)ക്കും ഭീകരവാദ ഗ്രൂപ്പായ ലഷ്കര് ഇ തൊയ്ബയ്ക്കും ബന്ധമുണ്ടെന്ന് എന്ഐഎ അറിയിച്ചു. ഐഎസ്ഐ അറിവോടെയാണ് ഭീകരര് പഹല്ഗാമിലെത്തിയതെന്നാണ് കണ്ടെത്തല്.
ഭീകരര് സാറ്റ്ലൈറ്റ് ഫോണ് ഉപയോഗിച്ചതിന് തെളിവ് ലഭിച്ചിട്ടുണ്ട്. മൂന്ന് സാറ്റ്ലൈറ്റ് ഫോണെങ്കിലും ആക്രമണ സമയത്ത് ഉപയോഗിച്ചുവെന്നും സാറ്റ്ലൈറ്റ് ഫോണുകളുടെ സിഗ്നല് ലഭിച്ചെന്നും എന്ഐഎ പറഞ്ഞു. സംഭവത്തില് 2800 പേരെ ഇതുവരെ എന്ഐഎ ചോദ്യം ചെയ്തിട്ടുണ്ട്. ഇതില് 150 പേര് നിലവില് എന്ഐഎ കസ്റ്റഡിയില് ഉണ്ട്. അതേസമയം കുപ് വാര, പുല്വാമ, സോപോര്, അനന്തനാഗ്, ബാരമുള്ള എന്നിവിടങ്ങളില് എന്ഐഎയുടെ റെയ്ഡുകള് തുടരുകയാണ്.
ഏപ്രില് 15ന് ഭീകരര് പഹല്ഗാമില് എത്തിയതിനും തെളിവുണ്ട്. പഹല്ഗാം ഭീകരാക്രമണത്തിനും 2024 ലെ സോനമാര്ഗ് ടണല് ആക്രമണത്തിനും ബന്ധമുണ്ടെന്നും എന്ഐഎ സംശയിക്കുന്നതായാണ് റിപ്പോര്ട്ടുകള്. ഭീകരാക്രമണത്തിന് പിന്നിലുള്ള ഹാഷിം മൂസയും അലി ഭായിയും പാകിസ്താന് പൗരന്മാരാണെന്ന് സ്ഥിരീകരിച്ചിട്ടുണ്ട്. പഹല്ഗാമിലെ ആക്രമണത്തിന് ഒരാഴ്ച മുമ്പാണ് ഭീകരവാദികള് ഇന്ത്യയിലേക്കെത്തിയത്.
