മുംബൈ : ഇന്ത്യയില് നിന്ന് അമേരിക്കയിലേക്ക് കയറ്റുമതി ചെയ്ത മാമ്പഴം തടഞ്ഞു. ഇന്ത്യയുടെ 15 ഷിപ്മെന്റുകളാണ് തടഞ്ഞത്. ആവശ്യമായ രേഖകളില്ലെന്ന് ചൂണ്ടിക്കാട്ടിയാണ് വിവിധ വിമാനത്താവളങ്ങളില് മാമ്പഴ ലോഡുകള് തടഞ്ഞതെന്ന് എക്കണോമിക് ടൈംസ് റിപ്പോര്ട്ട് ചെയ്തു.
ലോസ് ഏഞ്ചല്സ്, സാന്ഫ്രാന്സിസ്കോ, അറ്റ്ലാന്റ എയര്പോര്ട്ടുകളിലാണ് മാമ്പഴങ്ങള് തടഞ്ഞത്. ഈ മാമ്പഴങ്ങള് നശിപ്പിക്കാനോ തിരികെ ഇന്ത്യയിലേക്ക് കയറ്റുമതി ചെയ്യാനോ ആണ് നിര്ദ്ദേശം. ചരക്കുകൂലിയടക്കം നല്കി ഇന്ത്യയിലേക്ക് ഇവ തിരികെ കൊണ്ടുപോകുന്നത് വലിയ സാമ്പത്തിക നഷ്ടം ഉണ്ടാക്കുന്നതിനാല് മാമ്പഴങ്ങള് നശിപ്പിക്കാനാണ് അമേരിക്കയിലേക്ക് കയറ്റുമതി ചെയ്തവര് ആലോചിക്കുന്നതെന്ന് റിപ്പോര്ട്ടില് പറയുന്നു.
ഇന്ത്യയുടെ ഏറ്റവും വലിയ മാമ്പഴ കയറ്റുമതി വിപണിയാണ് അമേരിക്ക. നവി മുംബൈയില് മേയ് 8, 9 തീയതികളില് ഇറേഡിയേഷന് നടപടികള് പൂര്ത്തിയാക്കിയശേഷമായിരുന്നു അമേരിക്കയിലേക്കുള്ള മാമ്പഴക്കയറ്റുമതി. കീടങ്ങളെ തടയുന്നതിന് പ്രത്യേക ഡോസിലുള്ള റേഡിയേഷന് നടത്തുന്ന പ്രക്രിയയാണ് ഇറേഡിയേഷന്. യുഎസ് ഡിപ്പാര്ട്ട്മെന്റ് ഓഫ് അഗ്രികള്ച്ചറിലെ ഒരു ഉദ്യോഗസ്ഥന്റെ മേല്നോട്ടത്തിലാണ് ഇറേഡിയേഷന് നടപടിക്രമങ്ങള് പൂര്ത്തിയാക്കിയതെന്നും എന്നാല് ഇറേഡിയേഷന് പ്രക്രിയയുമായി ബന്ധപ്പെട്ട രേഖകളിലെ പൊരുത്തക്കേടുകള് ചൂണ്ടിക്കാട്ടിയാണ് ലോഡുകള് തടഞ്ഞതെന്നാണ് കയറ്റുമതിക്കാര് വെളിപ്പെടുത്തിയത്.
ഈ ഉദ്യോഗസ്ഥനാണ് കയറ്റുമതിക്ക് ആവശ്യമായ പിപിക്യു203 ഫോം സര്ട്ടിഫൈ ചെയ്തു നല്കേണ്ടത്. ഓഫിസര് തെറ്റായ പിപിക്യു203 ആണ് നല്കിയതെന്നും ഇതാണ് മാമ്പഴങ്ങള്ക്ക് അനുമതി നിഷേധിക്കാനിടയാക്കിയതെന്നും കയറ്റുമതിക്കാര് പ്രതികരിച്ചു. ഇത് മൂലം ഏകദേശം 5 ലക്ഷം ഡോളറിന്റെ (4.25 കോടി രൂപ) നഷ്ടമാണ് കയറ്റുമതിക്കാര് നേരിടുന്നത്.
