കണ്ണൂര്: പാല്ചുരത്തിലുണ്ടായ ഗതാഗതക്കുരുക്കില് ആംബുലന്സ് കുടുങ്ങിയതോടെ, സമയത്ത് ആശുപത്രിയില് എത്തിക്കാനാകാതെ ആദിവാസി ബാലന് മരിച്ചു. അമ്പായത്തോട് താഴെ പാല്ച്ചുരം കോളനിയിലെ പ്രജോഷ്-ബിന്ദു ദമ്പതിമാരുടെ മൂന്നരവയസ്സുള്ള മകന് പ്രജുല് ആണ് മരിച്ചത്. ജന്മനാ തലച്ചോര് സംബന്ധമായ രോഗബാധിതനാണ് പ്രജുല്.
ഇന്നലെ(15.06.25) അര്ധരാത്രി 12 ഓടെയായിരുന്നു സംഭവം. കുട്ടിയെ ആശുപത്രിയില് എത്തിക്കുന്നതിനായി വിളിച്ച ആംബുലന്സ് മലയോര ഹൈവേയിലെ ഗതാഗതക്കുരുക്കില് പെടുകയായിരുന്നു. തുടര്ന്ന് മുക്കാല് മണിക്കൂറോളം വൈകിയാണ് താഴെ പാല്ച്ചുരത്ത് എത്താനായത്. പിന്നീട് പാല്ചുരത്തിലും ആംബുലന്സ് ഒരു മണിക്കൂറോളം കുടുങ്ങി.ഏഴുകിലോമീറ്റര് ദൂരം പരമാവധി ഒന്പതുമിനിറ്റ് കൊണ്ട് എത്തേണ്ട ആംബുലന്സ് കുരുക്കില്പ്പെട്ട് മണിക്കൂറുകളോളം വൈകുകയായിരുന്നു
