ഹൈദരാബാദ്: വിമര്ശനങ്ങള് കടുത്തതോടെ രാമോജി റാവു ഫിലിം സിറ്റിയെകുറിച്ചുള്ള പരാമര്ശം പിന്വലിച്ച് ബോളിവുഡ് താരം കാജോള്.
തന്റെ ഏറ്റവും പുതിയ ചിത്രമായ ‘മാ’ എന്ന സിനിമയുടെ പ്രൊമോഷന്റെ ഭാഗമായി നടത്തിയ അഭിമുഖത്തിലാണ് ഹൈദരാബാദിലെ രാമോജി ഫിലിം സിറ്റി ‘ലോകത്തിലെ ഏറ്റവും പേടിപ്പെടുത്തുന്ന സ്ഥലങ്ങളില് ഒന്നാണെന്ന് താരം വിശേഷിപ്പിച്ചത്.’ തുടര്ന്ന് വന് വിവാദത്തിന് തിരികൊളുത്തിയിരുന്നു.
ഈ പരാമര്ശത്തിന് ശേഷം സോഷ്യല് മീഡിയയില് കടുത്ത വിമര്ശനങ്ങള് ഉയര്ന്നതോടെ, കാജോള് തന്റെ പ്രസ്താവന ഇപ്പോള് തിരുത്തിയിരിക്കുകയാണ്, രാമോജി ഫിലിം സിറ്റി ‘സുരക്ഷിതവും കുടുംബസൗഹൃദവുമായ’ സ്ഥലമാണെന്ന് വ്യക്തമാക്കിയിരിക്കുകയാണ്
ജൂണ് 19-ന് ഒരു പ്രമുഖ മാധ്യമത്തിന് നല്കിയ അഭിമുഖത്തിലാണ് കാജോള് രാമോജി ഫിലിം സിറ്റിയെ ‘പ്രേതബാധയുള്ള’ ഇടം എന്ന വിശേഷിപ്പിച്ച പരാമര്ശം വന്നത്. ഈ പരാമര്ശം സോഷ്യല് മീഡിയയില് വൈറലായതോടെ, നിരവധി ആളുകള് ഇത് ‘അടിസ്ഥാനരഹിത’മായ പ്രസ്താവനയെന്ന് വിമര്ശിച്ചു.
വിവാദം ശക്തമായതോടെ, ജൂണ് 23-ന് കാജോള് തന്റെ പ്രസ്താവനയില് വിശദീകരണം നല്കി. ‘രാമോജി ഫിലിം സിറ്റി ഒരു മികച്ച സ്ഥലമാണ്, തികച്ചും സുരക്ഷിതവും കുടുംബങ്ങള്ക്കും കുട്ടികള്ക്കും അനുയോജ്യവുമാണ്’ എന്ന് അവര് വ്യക്തമാക്കി. തന്റെ മുന് പരാമര്ശം തെറ്റിദ്ധാരണയുണ്ടാക്കിയെങ്കില് അതിന് ഖേദിക്കുന്നുവെന്നും, രാമോജി ഫിലിം സിറ്റിയില് തനിക്ക് മികച്ച അനുഭവമാണ് ലഭിച്ചതെന്നും കാജോള് കൂട്ടിച്ചേര്ത്തു.
ജൂണ് 27നാണ് കാജോള് അഭിനയിച്ച സൂപ്പര് നാച്വറല് ത്രില്ലര് മാ റിലീസ് ചെയ്യുന്നത്.
