മലപ്പുറം: മലപ്പുറത്ത് മഞ്ഞപ്പിത്തം ബാധിച്ച ഒരു വയസുകാരന് ചികിത്സ കിട്ടാതെ മരിച്ചു. മലപ്പുറം കോട്ടക്കലിനടുത്ത് പാങ്ങിലാണ് സംഭവം. അക്യുപങ്ചറിസ്റ്റായ ഹിറ ഹറീറ – നവാസ് ദമ്പതികളുടെ മകന് എസന് എര്ഹാനാണ് മരിച്ചത്. മാതാപിതാക്കള് ചികിത്സ നല്കാതിരുന്നതാണ് കുഞ്ഞിന്റെ മരണത്തിലേക്ക് നയിച്ചതെന്ന ആരോപണത്തില് കോട്ടക്കല് പൊലീസ് അന്വേഷണം ആരംഭിച്ചു.
കഴിഞ്ഞ വര്ഷം ഏപ്രില് 14ന് വീട്ടിലാണ് കുഞ്ഞിന് ജന്മം നല്കിയത്. ഇതുവരെ ഒരു പ്രതിരോധ കുത്തിവെപ്പുകളും എടുത്തിട്ടില്ലെന്നാണ് പൊലീസ് പറയുന്നത്. സമൂഹമാധ്യമങ്ങളില് അക്യുപങ്ചര് ചികിത്സ പ്രോത്സാഹിപ്പിക്കുന്നവരാണ് ഇവര്. ശാസ്ത്രീയമായ ചികിത്സ രീതിയെ എതിര്ക്കുന്ന നിലപാടുകള് സമൂഹമാധ്യമങ്ങളില് ഇവര് പങ്കുവെച്ചിരുന്നുവെന്നും ആരോപണമുണ്ട്. മഞ്ഞപ്പിത്തം ബാധിച്ച് കുഞ്ഞ് ഇന്നലെ വൈകുന്നേരമാണ് മരിച്ചത്. ഇന്ന് രാവിലെ മൃതദേഹം കബറടക്കുകയും ചെയ്തു.
