പത്തനംതിട്ട: കോന്നി ആനത്താവളത്തിലെ പ്രധാന ആകര്ഷണങ്ങളിലൊന്നായ കുട്ടിയാന കൊച്ചയ്യപ്പന് ചരിഞ്ഞു. നാലുവയസ്സായിരുന്നു പ്രായം. ബുധനാഴ്ച പുലര്ച്ചെയോടെയാണ് കൊച്ചയ്യപ്പനെ ചരിഞ്ഞ നിലയില് കണ്ടെത്തിയത്. വൈറ്റമിന്റെ കുറവ് കണ്ടെത്തിയതിനെ തുടര്ന്ന് ചികിത്സ നടത്തിവരികയായിരുന്നു.
വൈറസ് ബാധയാണോയെന്ന് സംശയിക്കുന്നതായി വനംവകുപ്പ് അധികൃതര് പറഞ്ഞു. പോസ്റ്റ്മോര്ട്ടത്തിന് ശേഷം മാത്രമാണ് യഥാര്ത്ഥ മരണക്കാരണം വ്യക്തമാകൂ. നാലുവര്ഷം മുന്പ് ആറുമാസം മാത്രം പ്രായമുള്ളപ്പോള് കൂട്ടംതെറ്റിയ നിലയിലാണ് കൊച്ചയ്യപ്പനെ വനംവകുപ്പ് അധികൃതര്ക്ക് ലഭിച്ചത്.
ഉള്ക്കാട്ടിലേക്ക് വിടാന് പലതവണ ശ്രമിച്ചെങ്കിലും വനംവകുപ്പ് അധികൃതര്ക്കൊപ്പം വീണ്ടും കാടിറങ്ങുന്ന സ്ഥിതിയുണ്ടായതോടെ വനംവകുപ്പ് മന്ത്രിയുടെ നിര്ദേശപ്രകാരമാണ് കോന്നി ആനത്താവളത്തിലേക്ക് കൊച്ചയ്യപ്പനെ എത്തിച്ചത്. കോന്നി ആനത്താവളത്തില് ആവശ്യമായ പരിശീലനം നല്കിവരവേയാണ് കൊച്ചയ്യപ്പന് ചരിഞ്ഞത്.
വനംവകുപ്പ് മന്ത്രി എ.കെ ശശീന്ദ്രന് ആണ് കുട്ടിയാനയ്ക്ക് കൊച്ചയ്യപ്പനെന്ന പേരുനല്കിയത്. ഏഴുവര്ഷത്തിനിടെ കോന്നി ആനത്താവളത്തില് നാല് ആനകളാണ് ചരിഞ്ഞത്. കുട്ടിയാന ചരിഞ്ഞതിനാല് കോന്നി ആനത്താവളത്തിലേക്ക് ബുധനാഴ്ച പൊതുജനങ്ങള്ക്ക് പ്രവേശനമുണ്ടാകില്ല.
