റിയാദ്: സെപ്റ്റംബർ പകുതിയോടെ  വേനൽക്കാലത്തിന് അറുതിയാകുമെന്ന് സൗദി കാലാവസ്ഥാ കേന്ദ്രം. സുഹൈൽ നക്ഷത്രമുദിച്ചതോടെയാണ് വേനൽക്കാലം പതിയെ പടിയിറങ്ങി സെപ്റ്റംബർ അവസാനം ശരത്കാലത്തിലേക്ക് രാജ്യത്തെ കാലാവസ്ഥ മാറും. സുഹൈൽ നക്ഷത്രം കഴിഞ്ഞ ദിവസം ദൃശ്യമായതോടെ അടുത്ത മാസം 23ന് ശരത്കാലത്തിന്റെ വരവാകും. കിഴക്കൻ പ്രവിശ്യയിൽ ചൂട് തുടരുന്നുവെങ്കിലും  അൽബാഹ, അസീർ, അബഹ, ജസാൻ അടങ്ങുന്ന തെക്ക് പടിഞ്ഞാറൻ മലയോരമേഖലകളിൽ മഴയും തണുപ്പും മഞ്ഞുമുള്ള സുഖകരമായ കാലാവസ്ഥയാണുണുള്ളത്.

ജസാൻ, അസീർ, അൽബഹ എന്നിവയുടെ ചില ഭാഗങ്ങളിൽ കനത്ത ഇടിമിന്നൽ, വെള്ളപ്പൊക്കം, ആലിപ്പഴം, ശക്തമായ കാറ്റ് എന്നിവ തുടരുമെന്ന് ദേശീയ കാലാവസ്ഥാ കേന്ദ്രം പ്രവചിക്കുന്നു. മക്ക, മദീന, നജ്‌റാൻ എന്നിവയുടെ ചില ഭാഗങ്ങളിൽ കാലാവസ്ഥ മിതമായതോ കനത്തതോ ആയിരിക്കുമെന്നും ആ പ്രദേശങ്ങളിലെ ഉയർന്ന പ്രദേശങ്ങളുടെ ചില ഭാഗങ്ങളിൽ മൂടൽമഞ്ഞ് രൂപപ്പെടാൻ സാധ്യതയുണ്ടെന്നും കേന്ദ്രം വിശദീകരിച്ചു.