തിരുവനന്തപുരം: ശബരിമല ക്ഷേത്രവുമായി ബന്ധപ്പെട്ട വിഷയങ്ങളിൽ കേരള സർക്കാരും സിപിഎം നേതൃത്വവും നൽകുന്ന സമീപനം പൊറുക്കാനാവാത്തതാനെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ ആരോപിച്ചു. ഹൈന്ദവ വിശ്വാസത്തോടും ലോകമെമ്പാടുമുള്ള അയ്യപ്പഭക്തരോടും സിപിഎം കാണിച്ച സമീപനം വലിയ വഞ്ചനയാണെന്നും അദ്ദേഹം പറഞ്ഞു.
ശബരിമലയുടെ ആചാരസംസ്കാരം തകർക്കാനുള്ള ശ്രമമാണ് 2018-ൽ സിപിഎം നടത്തിയതെന്നും, തുടർന്ന് പ്രതിഷേധിക്കുന്ന ഭക്തന്മാരെ അറസ്റ്റ് ചെയ്യുന്നതിലൂടെ സർക്കാരിന്റെ യഥാർത്ഥ നിലപാട് പുറത്തായതാണെന്നും അദ്ദേഹം ഓർമ്മിപ്പിച്ചു. ഇപ്പോൾ ‘അയ്യപ്പ സംഗമം’ എന്ന പേരിൽ ആളുകളെ കബളിപ്പിക്കാനുള്ള ശ്രമം സർക്കാർ നടത്തുന്നുവെന്നും രാജീവ് ചന്ദ്രശേഖർ ആരോപിച്ചു. ശബരിമല ക്ഷേത്രത്തിലെ സ്വർണ്ണം മോഷണവുമായി ബന്ധപ്പെട്ട സംഭവങ്ങളും ഈ പശ്ചാത്തലത്തിൽ ആലോചിക്കേണ്ടതാണെന്നും, ഇത് ഭക്തജനങ്ങളുടെ വിശ്വാസത്തെ തകർക്കുന്നുണ്ട് എന്നും അദ്ദേഹം കുറ്റപ്പെടുത്തി.
“പിണറായി വിജയൻ്റെ നേതൃത്വത്തിലുള്ള സിപിഎം നയിക്കുന്ന സർക്കാർ അഴിമതിയിലും ധിക്കാരത്തിലും നീതിച്യുതിയിലും മുന്നിലാണ്. ഹിന്ദുക്കളോട് വിവേചനം പുലർത്തുന്ന ഭരണമാണ് ഇക്കാര്യങ്ങളിൽ പ്രകടമാകുന്നത്. ക്ഷേത്രങ്ങളിലെ അഴിമതിയേയും മോഷണങ്ങളേയും അവർ ന്യായീകരിക്കുന്ന തരമാണ് ഇപ്പോൾ കാണുന്നത്,” എന്നും അദ്ദേഹം പറഞ്ഞു.
സിപിഎം, കോൺഗ്രസ് പാർട്ടികളാണ് അഴിമതിയിലേയും അധികാര ദുരുപയോഗത്തിലേയും പ്രധാന മത്സരാർത്ഥികളെന്ന് രാജീവ് ചന്ദ്രശേഖർ ആരോപിച്ചു. കേരളത്തിൽ സർക്കാർ നടത്തിയിരിക്കുന്ന ഗുരുതരമായ കുറ്റകൃത്യങ്ങൾ സ്വതന്ത്രവും വിശ്വസ്തവുമായ അന്വേഷണ ഏജൻസികൾ വഴി പരിശോധിക്കേണ്ടതുണ്ട് എന്നും അദ്ദേഹം ആവശ്യപ്പെട്ടു.
