കൊച്ചി: മുതിർന്ന മാധ്യമ പ്രവർത്തകനും, എറണാകുളം പ്രസ് ക്ലബ്ബിന്റെ സ്ഥാപക നേതാക്കളിൽ ഇന്ന് ഉള്ള ഏക വ്യക്തിയും, അടിയന്തരാവസ്ഥയിൽ ആദ്യം ജയിലിൽ പോയ പത്ര പ്രവർത്തകനുമായ രാജേട്ടൻ എന്ന പി രാജന്റെ നവതി അഘോഷിച്ച് സാംസ്കാരിക കൊച്ചി.

നവതി ആഘോഷങ്ങൾക്കൊപ്പം അദ്ദേഹത്തിന്റെ സഹോദരി നളിനിയുടെ പിറന്നാൾ ആഘോഷവും നടന്നു. ഇന്നലെ 18/10/25 എറണാകുളം ഐ.എം.എ.യിൽ ആയിരുന്ന നവതി സായാഹ്നം. പി.രാജനും, സഹോദരി നളിനിയും ചേർന്ന് നിലവിളക്ക് കൊളുത്തി ആഘോഷങ്ങൾക്ക് തുടക്കമിട്ടു.

മഹാരാജാസ് കോളേജിലെ പൂർവ്വ വിദ്യാർത്ഥികളായിരുന്ന ഇരുവരെയും മഹാരാജാസ് കോളേജ് ഓൾഡ് സ്റ്റുഡന്റസ് അസോസിയേഷൻ ജനറൽ സെക്രട്ടറി സി ഐ സി സി ജയചന്ദ്രനും, പൂർവ്വ വിദ്യാർത്ഥിയും,മാധ്യമ പ്രവർത്തകനും, മുൻ എം.പി.യും, എം എൽ എ യുമായ ഡോ. സെബാസ്റ്റ്യൻ പോളും ചേർന്ന് പൊന്നാടയണിയിച്ചു.

മുൻ സംസ്കൃത സർവ്വകലാശല വി.സി.യും പി എസ് സി ചെയർമാനുമായിരുന്ന ഡോ.കെ.എസ്.രാധാകൃഷ്ണൻ, ഡോ. സെബാസ്റ്റ്യൻ പോൾ, ജസ്റ്റിസ് സിയാദ് റഹിമാൻ, മുൻ മന്ത്രി ജോസ് തെറ്റിയിൽ, പ്രൊഫ.എം.തോമസ് മാത്യു, മുതിർന്ന മാധ്യമ പ്രവർത്തകൻ തോമസ് ജേക്കബ്ബ്, അഡ്വക്കേറ്റ് സെയ്താലിക്കുട്ടി, പ്രൊഫ.കെ.വി.തോമസ്, എറണാകുളം പ്രസ് ക്ലബ്ബ് പ്രസിഡന്റ് ആർ.ഗോപകുമാർ, മാധ്യമ പ്രവർത്തകരായ ജ്യോതിർ ഘോഷ്, എം.വി. ബെന്നി, കവിയും ഗാനരചയിതാവുമായ ആർ.കെ.ദാമോദരൻ, അഡ്വക്കേറ്റ് ജയശങ്കർ, മുൻ മന്ത്രി ഡൊമിനിക്ക് പ്രസന്റേഷൻ, കെ.ബാബു, കുമ്മനം രാജശേഖരൻ, മാധവ കൈമൾ, ചന്ദ്രിക മെഹബൂബ്, എസ്.കെ.മാധവൻ,
എന്നിവർ ഇരുവർക്കും പിറന്നാൾ ആശംസകൾ നേർന്നു.

കുടുംബാംഗങ്ങളും, സുഹൃത്തുക്കളും, എറണാകുളത്തെ മുൻ കാല മാധ്യമ പ്രവർത്തകരും, മുതിർന്നമാധ്യമ പ്രവർത്തക നേതാക്കളായ രാജ്മോഹനും, അബ്ദുള്ള മട്ടാഞ്ചേരിയും, പ്രസ് ക്ലബ്ബ് മുൻ ജനറൽ സെക്രട്ടറി ഹരികൃഷ്ണനും, ഇപ്പോഴത്തെ ജനറൽ ഷജിൽ കുമാറും,
എറണാകുളം പ്രസ്ക്ലബ്ബിന്റെ മുൻ ഭാരവാഹികളായ അരുൺകുമാറും, എം.ആർ. അജയനും അടക്കം ഒട്ടേറെ പ്രമുഖർ നവതി ആശംസകൾ അർപ്പിച്ചു.

ആർട്ടിഫിഷ്യൽ ഇന്റലിജസിന്റെ സഹായത്തോടെ നിർമ്മിച്ച രാജേട്ടന്റെയും, കമല ചേച്ചിയുടെയും വിവാഹ ചടങ്ങുകൾ ഉൾപ്പെട്ട കുടുംബ ചിത്രങ്ങളുടെ വീഡിയോ പ്രദർശനം പരിപാടിയിൽ പങ്കെടുത്തവർക്ക് പുതിയ അനുഭവം സമ്മാനിച്ചു.