പത്തനംതിട്ട: ബിരിയാണി അരിയില് നിന്ന് ഭക്ഷ്യവിഷബാധയുണ്ടായെന്ന പരാതിയില്, അരി ബ്രാന്റ് ഉടമയ്ക്കും, കമ്പനിയുടെ ബ്രാന്ഡ് അബാസഡറായ ദുല്ഖര് സല്മാനുമെതിരെ നോട്ടീസയച്ച് പത്തനംതിട്ട ജില്ലാ ഉപഭോക്തൃ തര്ക്ക പരിഹാര കമ്മീഷന്.
നടന് ദുല്ഖര് സല്മാനോടും റൈസ് ബ്രാന്ഡ് ബിരിയാണി അരി കമ്പനി ഉടമയോടും ഡിസംബര് മൂന്നിന് കമ്മീഷന് മുന്പാകെ ഹാജരാകാനാണ് നിര്ദേശം.
പത്തനംതിട്ട സ്വദേശിയായ പിഎന് ജയരാജന് സമര്പ്പിച്ച പരാതിയിലാണ് നോട്ടീസ് അയച്ചതെന്ന് പത്തനംതിട്ട ജില്ലാ ഉപഭോക്തൃ തര്ക്ക പരിഹാര കമ്മീഷന് ഉദ്യോഗസ്ഥര് സ്ഥിരീകരിച്ചു. പത്തനംതിട്ടയില് കാറ്ററിങ് സ്ഥാപനം നടത്തുന്ന പരാതിക്കാരന് വിവാഹ ചടങ്ങിന് ബിരിയാണി വെക്കാന് ഈ ബ്രാന്ഡ് അരി വാങ്ങിയിരുന്നുവെന്ന് പരാതിയില് പറയുന്നു. എന്നാല് അരിച്ചാക്കില് പാക്ക് ചെയ്ത ഡേറ്റും എക്സ്പൈറി ഡേറ്റും രേഖപ്പെടുത്തിയിരുന്നില്ലെന്നും അരോപണമുണ്ട്.
ഈ അരി വെച്ച് ബിരിയാണി ഉണ്ടാക്കി വിളമ്പിയതിന് പിന്നാലെ ബിരിയാണി കഴിച്ചവര്ക്ക് ഭക്ഷ്യവിഷബാധയേറ്റെന്നാണ് പരാതി. അരി വിറ്റ മലബാര് ബിരിയാണി ആന്റ് സ്പൈസസ് പത്തനംതിട്ട എന്ന സ്ഥാപനത്തിന്റെ മാനേജര്ക്കെതിരെയും പരാതിയുണ്ട്. എങ്കിലും ബ്രാന്ഡ് അംബാസഡറായ ദുല്ഖര് സല്മാനെ മുഖ്യപ്രതിയാക്കിയാണ് പരാതി സമര്പ്പിച്ചിരിക്കുന്നത്. ദുല്ഖര് സല്മാന്റെ പരസ്യം കണ്ട് സ്വാധീനിക്കപ്പെട്ടാണ് താന് ഈ അരി വാങ്ങിയതെന്നാണ് പരാതിക്കാരന് പറയുന്നത്.
ഡിസംബര് 12 ന് മൂന്ന് പേരോടും ഹാജരാകാന് ഉപഭോക്തൃ തര്ക്ക പരിഹാര കമ്മീഷന് നോട്ടീസില് ആവശ്യപ്പെട്ടിട്ടുണ്ട്. അരി വാങ്ങാന്ചിലവായ 10250 രൂപയ്ക്ക് പുറമെ അഞ്ച് ലക്ഷം രൂപയാണ് പരാതിക്കാരന് നഷ്ടപരിഹാരമായി ആവശ്യപ്പെട്ടിരിക്കുന്നത്.
