ധാക്ക: ബാവുല് ദായകന് അബുള് സര്ക്കാരിനെ അറസ്റ്റ് ചെയ്തതിനെ തുടര്ന്ന് ബംഗ്ലാദേശില് വീണ്ടും പ്രതിഷേധം ശക്തം .
വിദ്യാര്ത്ഥികളും കലാകാരന്മാരും പ്രതിഷേധവുമായി തെരുവിലിങ്ങി. മുന് പ്രധാനമന്ത്രി ഷെയ്ഖ് ഹസീന പുറത്താക്കപ്പെട്ട ശേഷം രാജ്യത്ത് ഫാസിസത്തിന്റെ പുതിയ രൂപം ഉയര്ന്നുവരികയാണെന്നാണ് വിമര്ശനം.
മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സര്ക്കാരിന് കീഴില് വര്ഗീയ സംഘര്ഷങ്ങള് വര്ദ്ധിച്ചുവെന്നും ആരോപിച്ചാണ് യുവാക്കളില് ഒരു വിഭാഗമടക്കം തെരുവിലിറങ്ങിയിരിക്കുന്നത്.
ബംഗ്ലാദേശിലും പശ്ചിമ ബംഗാളിലുമുള്ള ഗായക സമൂഹമാണ് ബാവുല് ഗായകര്. അബുല് സര്ക്കാര് തന്റെ സംഗീത പരിപാടിക്കിടെ ഇസ്ലാമിക വിശ്വാസത്തെ അപമാനിച്ചെന്നും മതവികാരം വ്രണപ്പെടുത്തിയെന്നും ആരോപിച്ചാണ് ഇദ്ദേഹത്തെ അറസ്റ്റ് ചെയ്തത്. ഒരു ഇമാമും മറ്റ് നാല് പേരും ചേര്ന്ന് ഇദ്ദേഹത്തിനെതിരെ പൊലീസില് പരാതി നല്കിയിരുന്നു.
രണ്ട് ദിവസത്തിന് ശേഷം സംഭവത്തില് തൗഹീദി ജനത എന്ന സംഘടന നടത്തിയ പ്രതിഷേധ മാര്ച്ചിനിടെ നാല് ബാവുല് ഗായകരെ തിരഞ്ഞുപിടിച്ച് മര്ദിച്ചു. ബംഗ്ലാദേശില് ഷെയ്ഖ് ഹസീന പുറത്താക്കപ്പെട്ട ശേഷം ശക്തിപ്പെട്ട ഏകദൈവ വിശ്വാസി സമൂഹമാണ് തൗഹിദി ജനത.
ഇവര് സൂഫിസത്തെയും ശക്തമായി എതിര്ക്കുന്നുണ്ട്. ഈ കൂട്ടമാണ് ബംഗ്ലാദേശില് വലിയ തോതില് ആരാധനാലയങ്ങള്ക്ക് നേരെ അക്രമം അഴിച്ചുവിട്ടത്. ഗുരുതരമായി പരിക്കേറ്റ ബാവുല് ഗായകരെ ആശുപത്രികളില് പ്രവേശിപ്പിച്ചതിന് പിന്നാലെയാണ് പ്രതിഷേധവുമായി യുവാക്കള് തെരുവിലിറങ്ങിയത്.
