കോഴിക്കോട്: മെഡിക്കൽ കോളേജ് മേഖലയിൽ സ്റ്റേഷനറി കടകളുടെ മറവിൽ വിദ്യാർത്ഥികൾക്ക് നിരോധിത പുകയില ഉത്പന്നങ്ങൾ വിൽക്കുകയാണെന്ന രഹസ്യവിവരത്തെ തുടർന്ന് പോലീസ് നടത്തിയ പരിശോധനയിൽ രണ്ട് പേരെ അറസ്റ്റ് ചെയ്തു. കോട്ടപ്പറമ്പ് സ്വദേശി പിലാത്തോട്ടത്തിൽ മീത്തൽ കെ. അനിൽ കുമാർ (49), കൊളത്തറ ശാരദാമന്ദിരം കെ.പി ഹൗസിൽ കെ.പി. സഫീർ എന്നിവരാണ് പിടിയിലായത്.
എസ്.ഐമാരായ സുലൈമാനും അമൽ ജോയും നേതൃത്വത്തിലുള്ള മെഡിക്കൽ കോളേജ് പോലീസ് സംഘമാണ് പ്രതികളെ കസ്റ്റഡിയിലെടുത്തത്. ഡാൻസാഫ് ടീം നടത്തിയ രഹസ്യ നിരീക്ഷണത്തിനിടെ സ്റ്റേഷനറി കടകളിൽ ‘ഹാൻസ്’ അടക്കമുള്ള നിരോധിത പുകയില ഉത്പന്നങ്ങൾ വിൽക്കുന്നുവെന്നത് സ്ഥിരീകരിച്ചതോടെയാണ് നടപടി.
രണ്ട് കടകളിൽ നിന്നായി 71 പായ്ക്കറ്റുകൾ നിരോധിത ഉൽപ്പന്നങ്ങൾ പോലീസ് പിടിച്ചെടുത്തു. ഡാൻസാഫ് സ്ക്വാഡിലെ എസ്.ഐ. അബ്ദുറഹ്മാൻ, എ.എസ്.ഐ. അനീഷ്, തൗഫീഖ്, മുഹമ്മദ് മഷ്ഹൂർ, എസ്.ഐ. കിരൺ, ബിനോയ് സാമുവൽ, സുരാഗ്, ജിതിൻ എന്നിവരും പരിശോധന സംഘത്തിലുണ്ടായിരുന്നു.
