തൃശൂർ: കുന്നംകുളം കീഴൂർ കാർത്ത്യായനി ദേവി ക്ഷേത്രത്തിലെ കാർത്തിക മഹോത്സവം ഇന്ന് ഭക്തിപൂർവ്വം ആരംഭിച്ചു. രാവിലെ അഞ്ച് മണി മുതൽ നടന്ന വിശേഷാൽ അഭിഷേകങ്ങളും പൂജകളും ഭക്തജനങ്ങളുടെ സാന്നിധ്യത്തിൽ വൈഭവകരമായി നടന്നു. ഉച്ചയ്ക്ക് കിഴക്കേനടയിൽ പ്രത്യേകമായി സജ്ജമാക്കിയ പന്തലിൽ നിന്നാരംഭിച്ച പഞ്ചവാദ്യത്തിന്റെ താളൊലിയോട് കൂടിയാണ് ഗജവീരനായ വലിയപുരക്കൽ സൂര്യൻ തിടമ്പേറ്റത്.
വൈകുന്നേരം അഞ്ചു മണിയോടെ ഗജവീരന്മാർ അണിനിരക്കുന്ന അകമ്പടിയോടെ സംയുക്ത ഉത്സവ സമിതിയുടെ പൂരം കിഴക്കേനടയിലെ ക്ഷേത്രത്തിന് സമീപം ആരംഭിക്കും. പടിഞ്ഞാറെ നടയിലെ പാലച്ചുവട്ടിൽ അരങ്ങേറുന്ന പാണ്ടിമേളം വൈകിട്ട് ആറു മണിയോടെ സമാപിക്കും. തുടർന്ന് ചുറ്റുവിളക്കും നിറമാലയും ദീപാരാധനയും കാർത്തികദീപം തെളിക്കലും ഭക്തരെയാകർഷിക്കും.
ആറര മണിയോടെ നടപ്പുരയിൽ കേളിയും തായമ്പകയും അരങ്ങേറും. അതിന് പിന്നാലെ കൊമ്പ്പ്പറ്റും കുഴൽപറ്റും ഉൾപ്പെടെയുള്ള വാദ്യകലാപരിപാടികളും സംഘടിപ്പിച്ചിട്ടുണ്ട്. ക്ഷേത്രത്തിലെ വിശേഷമായ വിളക്ക് ആചാരം രാത്രി എട്ട് മണിക്ക് നടക്കും. നിറദീപങ്ങളുടെ പ്രകാശമാലയിൽ ഇടയ്ക്ക പ്രദക്ഷിണമടക്കമുള്ള വാദ്യവിശേഷങ്ങളും ഭക്തിസാന്ദ്രമായ അന്തരീക്ഷം സൃഷ്ടിക്കും.
