കോഴിക്കോട്: വരാനിരിക്കുന്ന നിയമസഭാ തിരഞ്ഞെടുപ്പിനുള്ള ആർജെഡി സ്ഥാനാർഥികളെ സംസ്ഥാന അധ്യക്ഷൻ എം.വി. ശ്രേയാംസ് കുമാർ പ്രഖ്യാപിച്ചു. വടകരയിൽ എം.കെ. ഭാസ്കരനും കൂത്തുപറമ്പിൽ പി.കെ. പ്രവീണും കല്പറ്റയിൽ പി.കെ. അനിൽ കുമാറുമാണ് മത്സരരംഗത്തുള്ളത്. കഴിഞ്ഞ അഞ്ച് തവണയായി താൻ മത്സരിച്ച കല്പറ്റ മണ്ഡലത്തിൽ ഇത്തവണ മറ്റുള്ളവർക്ക് അവസരം നൽകുന്നതിന്റെ ഭാഗമായാണ് മാറിനിൽക്കുന്നതെന്ന് ശ്രേയാംസ് കുമാർ വ്യക്തമാക്കി. മുന്നണിയിൽ നിന്ന് മത്സരിക്കാൻ നിർബന്ധമുണ്ടായിരുന്നുവെന്നും അതിന് എൽഡിഎഫിനോട് കടപ്പാടുണ്ടെന്നും അദ്ദേഹം കൂട്ടിച്ചേർത്തു.
ശ്രേയാംസ് കുമാറിന് പകരം കല്പറ്റയിൽ സ്ഥാനാർഥിയായ പി.കെ. അനിൽ കുമാർ വയനാട് ഡിസിസി സെക്രട്ടറിയും ഐഎൻടിയുസി സംസ്ഥാന ജനറൽ സെക്രട്ടറിയുമായിരുന്നു. അഞ്ച് വർഷം മുൻപ് കോൺഗ്രസ് വിട്ട് ആർജെഡിയിൽ ചേർന്ന അനിൽ കുമാർ, മുതിർന്ന കോൺഗ്രസ് നേതാവായിരുന്ന പി.കെ. ഗോപാലന്റെ മകനാണ്. കൂത്തുപറമ്പിൽ സ്ഥാനാർഥിയായ പി.കെ. പ്രവീൺ നിലവിലെ എംഎൽഎ കെ.പി. മോഹനന്റെ സഹോദരപുത്രനാണ്. മുൻപ് പാനൂർ നഗരസഭാ കൗൺസിലറായും പഞ്ചായത്തംഗമായും പ്രവർത്തിച്ചിട്ടുള്ള അദ്ദേഹം യുവജനതാദൾ മുൻ സംസ്ഥാന പ്രസിഡന്റ് കൂടിയാണ്. വടകരയിൽ പാർട്ടിയുടെ കരുത്തനായ നേതാവ് എം.കെ. ഭാസ്കരനാണ് ജനവിധി തേടുന്നത്
