കൊച്ചി: കലൂര് സ്റ്റേഡിയം അപകടത്തില് രണ്ട് കോടി രൂപ നഷ്ടപരിഹാരം ആവശ്യപ്പെട്ട് ഉമ തോമസ് എംഎല്എ വക്കീല് നോട്ടീസ് അയച്ചു. ഗിന്നസ് റെക്കോഡിടാന് ലക്ഷ്യമിട്ട് നടത്തിയ പരിപാടിയുടെ വിശദാംശങ്ങള് ശേഖരിച്ച ശേഷമാണ് വക്കീല് നോട്ടീസ്. ജിസിഡിഎ, സംഘാടകരായ മൃദംഗവിഷന് എന്നിവരെ എതിര്കക്ഷികളാക്കിയാണ് നോട്ടീസ് അയച്ചിരിക്കുന്നത്.
കൊച്ചി കലൂര് സ്റ്റേഡിയത്തിലെ താല്കാലിക സ്റ്റേജില് നിന്ന് വീണ് പരിക്കേറ്റ ഉമ തോമസ് എംഎല്എ 46 ദിവസം നീണ്ട ചികിത്സക്കുശേഷമായിരുന്നു ആശുപത്രി വിട്ടത്.
കഴിഞ്ഞ ഡിസംബര് 29 നാണ് 12,000 പേര് പങ്കെടുത്ത നൃത്ത പരിപാടിക്കിടെ കലൂര് സ്റ്റേഡിയത്തില് താത്കാലികമായി കെട്ടിപ്പൊക്കിയ സ്റ്റേജില് നിന്ന് വീണ് ഉമ തോമസിന് പരിക്കേറ്റത്. വിഐപി ഗാലറിയുടെ അറ്റത്തുള്ള ഇരിപ്പിടത്തിലേക്ക് പോവുകയായിരുന്ന ഉമ തോമസ് കാല്വഴുതി താത്കാലികമായി കെട്ടിയ ബാരിക്കേഡുകളും മറികടന്ന് നിന്ന് താഴേക്ക് വീഴുകയായിരുന്നു. താത്കാലികമായി സ്ഥാപിച്ചിരുന്ന ബാരിക്കേഡുകള് ബലമുള്ളതായിരുന്നില്ല. 20 അടിയോളം താഴ്ചയിലേക്കാണ് വീണത്.
