ടെഹ്റാന്: ഇറാനില് ആഭ്യന്തര പ്രക്ഷോഭം ആളിപ്പടരുന്നതിനിടെ രാജ്യം തങ്ങളുടെ വ്യോമപാത അപ്രതീക്ഷിതമായി അടച്ചു. ഇതോടെ യൂറോപ്പിലേക്കും പശ്ചിമേഷ്യയിലേക്കുമുള്ള വിമാന സര്വീസുകള് പ്രതിസന്ധിയിലായി.
15.01.26 വ്യാഴാഴ്ച പുലര്ച്ചെയാണ് ഇറാന് വ്യോമപാത അടച്ചുകൊണ്ടുള്ള നോട്ടീസ് പുറപ്പെടുവിച്ചത്. ഇതോടെ ഇന്ത്യയില് നിന്നുള്ള വിമാനങ്ങള് ഉള്പ്പെടെയുള്ള അന്താരാഷ്ട്ര സര്വീസുകള് വഴിതിരിച്ചുവിടുകയോ റദ്ദാക്കുകയോ ചെയ്യുകയാണ്.
ജോര്ജിയയിലെ ടിബിലിസിയില് നിന്ന് ഡല്ഹിയിലേക്ക് വന്ന ഇന്ഡിഗോ വിമാനം ആണ് ഇറാന് വ്യോമപാത വഴി ഏറ്റവും ഒടുവില് കടന്നുപോയ വിദേശ വിമാനമെന്ന് ഫ്ലൈറ്റ് ട്രാക്കിംഗ് വിവരങ്ങള് സൂചിപ്പിക്കുന്നു. വ്യാഴാഴ്ച പുലര്ച്ചെ 2:35-നാണ് ഈ വിമാനം ഇറാന് മുകളിലൂടെ പറന്നത്. തൊട്ടുപിന്നാലെ രാജ്യം വ്യോമപാത പൂര്ണ്ണമായും അടയ്ക്കുകയായിരുന്നു.
