കൊല്ലം: പത്തനാപുരത്ത് പൊലീസ് വാഹനം ഇടിച്ച് തകർത്ത ശേഷം കടന്നുകളഞ്ഞ ഗുണ്ടാ നേതാവിനെ പൊലീസ് സാഹസികമായി പിടികൂടി. തമിഴ്നാട്ടിലെ തെങ്കാശിയിൽ നിന്നാണ് പ്രതിയെ കസ്റ്റഡിയിലെടുത്തത്. പുലർച്ചെ 3.30ഓടെയാണ് പൊലീസ് പ്രത്യേക സംഘത്തിന്റെ നേതൃത്വത്തിൽ ഇയാളെ പിടികൂടിയത്.
അതീവ ജാഗ്രതയോടെ ഒളിവിൽ കഴിഞ്ഞിരുന്ന സജീവ്, തമിഴ്നാട്–കേരള അതിർത്തിയിലെ ഒരു ഗ്രാമത്തിലായിരുന്നു താമസം. താടിയും മുടിയും മാറ്റി വേഷം മാറിയായിരുന്നു ഒളിവ് ജീവിതം. മൊബൈൽ ഫോൺ പോലും ഉപയോഗിക്കാതെ പൊലീസിനെ വെട്ടിച്ച് മാറിനിന്നിരുന്നു.
പ്രതിയുടെ അടുത്ത പരിചയക്കാരെയും ബന്ധുക്കളെയും ചോദ്യം ചെയ്തതിലൂടെയാണ് ഇയാൾ തമിഴ്നാട്ടിലേക്ക് കടന്നതായി പൊലീസിന് സൂചന ലഭിച്ചത്. അവസാനമായി വിളിച്ച ഫോൺ നമ്പറുകൾ അടക്കമുള്ള സാങ്കേതിക വിവരങ്ങളും അന്വേഷണത്തിന് സഹായകമായി.
തെങ്കാശിയിലെ ഒരു വീട്ടിനുള്ളിൽ ഒളിവിൽ കഴിയുമ്പോഴാണ് പൊലീസ് ഇയാളെ പിടികൂടിയത്. അറസ്റ്റിന്റെ സമയത്ത് ഇയാളുടെ കിടക്കയ്ക്കടുത്ത് കത്തിയും കണ്ടെത്തി. പത്തനാപുരം എസ്.എച്ച്.ഒ ബിനു, എസ്.ഐ ഷാനവാസ് എന്നിവരുടെ നേതൃത്വത്തിലാണ് പൊലീസ് സംഘം സാഹസികമായി പ്രതിയെ കീഴടക്കിയത്.
