തൃശ്ശൂർ: കേന്ദ്ര– സംസ്ഥാന സർക്കാരുകളുടെ സംയുക്താഭിമുഖ്യത്തിൽ നടപ്പിലാക്കുന്ന പദ്ധതിയുടെ ഭാഗമായി തൃശ്ശൂർ ജില്ലാ വ്യവസായ കേന്ദ്രം സംരംഭകർക്കായി സാങ്കേതിക ക്ലിനിക് സംഘടിപ്പിച്ചു. ജില്ലാ വ്യവസായ കേന്ദ്രം ജനറൽ മാനേജർ ശ്രീമതി ഷീബ എസ് അധ്യക്ഷയായ ചടങ്ങ് തൃശ്ശൂർ ജില്ലാ കളക്ടർ ഉദ്ഘാടനം ചെയ്തു.
ദേശീയ ശാസ്ത്ര സാങ്കേതിക ഗവേഷണ സ്ഥാപനത്തിലൂടെ വികസിപ്പിച്ചെടുത്ത വിവിധ സാങ്കേതിക വിദ്യകൾ സംരംഭകർ എങ്ങനെ പ്രായോഗികമായി ഉപയോഗപ്പെടുത്താമെന്ന വിഷയത്തിൽ ഗവേഷണ സ്ഥാപനത്തിലെ ചീഫ് ശാസ്ത്രജ്ഞ ഡോക്ടർ നിഷി പി, പ്രിൻസിപ്പൽ ശാസ്ത്രജ്ഞ ഡോക്ടർ പ്രവീൺ എന്നിവർ ക്ലാസുകൾ നയിച്ചു.കാര്യക്ഷമമായ പാക്കേജിംഗിന്റെ പ്രാധാന്യം, പാക്കേജിംഗ് മേഖലയിലെ പുതിയ പ്രവണതകൾ എന്നീ വിഷയങ്ങളിൽ കൊച്ചി ആസ്ഥാനമായ ഗ്ലോബൽ പാക്കേജിംഗ് സ്ഥാപനത്തിന്റെ ഉടമ ശ്രീ അജിത്ത് കുരിയക്കോസ് സംരംഭകർക്ക് വിശദീകരണം നൽകി.
പാക്കിംഗ് ലൈസൻസ് സംബന്ധിച്ച നിയമങ്ങളും നടപടിക്രമങ്ങളും എന്ന വിഷയത്തിൽ ലീഗൽ മെട്രോളജി ഇൻസ്പെക്ടർ ശ്രീമതി ജീന ആർ സംരംഭകർക്ക് അവബോധം നൽകി. വിവിധ സ്മാർട്ട്, സുസ്ഥിര പാക്കേജിംഗ് രീതികൾ പാക്കിംഗ് മെഷിനറി സ്ഥാപനത്തിന്റെ മാനേജിംഗ് ഡയറക്ടർ ശ്രീ സനിൽ ആനന്ദ് പരിചയപ്പെടുത്തി.
ജില്ലാ വ്യവസായ കേന്ദ്രം മാനേജർമാരായ ശ്രീ പ്രണാപ് ജി, ശ്രീമതി സിന്ധു പി ആർ, ശ്രീമതി ബിന്ദു കെ ആർ, അസിസ്റ്റന്റ് ഡയറക്ടർ ശ്രീ വിശാഖ് യു, ഉപജില്ലാ വ്യവസായ ഓഫീസർ ശ്രീമതി മിനി പി ആർ എന്നിവർ പരിപാടിയിൽ സംസാരിച്ചു.എൺപത്തഞ്ച് സംരംഭകർ പരിപാടിയിൽ പങ്കെടുത്തു. സംരംഭകർക്ക് സംശയനിവാരണത്തിനായി ഹെൽപ് ഡെസ്ക് സംവിധാനവും പരിപാടിയുടെ ഭാഗമായി ഒരുക്കിയിരുന്നു.
