മലപ്പുറം: നിയമസഭാ തിരഞ്ഞെടുപ്പിൽ പൊന്നാനി മണ്ഡലം എൽഡിഎഫ് സ്ഥാനാർഥിയായി അഡ്വ. എം.കെ. സക്കീർ മത്സരിക്കും. തെരഞ്ഞെടുപ്പിനു മുന്നോടിയായി എം.കെ. സക്കീർ സംസ്ഥാന വഖഫ് ബോർഡ് ചെയർമാൻ സ്ഥാനം രാജിവെച്ചു. പുതിയ ചെയർമാനായി കെ.എസ്. ഹംസയെ നിയമിച്ച് സംസ്ഥാന സർക്കാർ ഉത്തരവ് വെള്ളിയാഴ്ച വൈകുന്നേരം പുറപ്പെടുവിച്ചു.

മുസ്ലിം ലീഗ് സംസ്ഥാന സെക്രട്ടറിയായിരുന്ന കെ.എസ്. ഹംസ കഴിഞ്ഞ ലോക്‌സഭാ തെരഞ്ഞെടുപ്പിൽ പൊന്നാനി മണ്ഡലത്തിൽ എൽഡിഎഫ് സ്ഥാനാർഥിയായിരുന്നു. വഖഫ് ബോർഡ് പുതുക്കി രൂപീകരിച്ച ഉത്തരവ് ഫെബ്രുവരി 4-നു പുറപ്പെടുവിക്കുകയായിരുന്നു. എം.കെ. സക്കീർ രണ്ടാമതായി ചെയർമാനായി നിയമിക്കപ്പെട്ടെങ്കിലും 37 ദിവസം മാത്രമാണ് ഇരുന്നത്.