തിരുവനന്തപുരം: വിവിധ കാരണങ്ങളാൽ കോൺഗ്രസ് വിട്ട് ഇടതുപക്ഷത്തേക്ക് പോയ നേതാക്കൾക്ക് തിരികെ വരാൻ ലഭിച്ച സുവർണ്ണാവസരമാണിതെന്ന് ചെറിയാൻ ഫിലിപ്പ്. എൽ.ഡി.എഫ് എന്ന മുങ്ങുന്ന കപ്പലിൽ നാണംകെട്ട് അള്ളിപ്പിടിച്ചിരുന്ന് അപമൃത്യു വരിക്കണമോ എന്ന് ഇവർ ഗൗരവമായി ചിന്തിക്കണമെന്ന് അദ്ദേഹം ഫേസ്ബുക്ക് കുറിപ്പിലൂടെ ആവശ്യപ്പെട്ടു. സി.പി.എം പുറമ്പോക്കിൽ അപമാനം സഹിച്ചു കഴിയുന്നവർക്ക് മാതൃസംഘടനയിലേക്ക് മടങ്ങാനുള്ള സമയമാണിതെന്നും അദ്ദേഹം ഓർമ്മിപ്പിച്ചു.
കോൺഗ്രസിൽ മടങ്ങിയെത്തിയാലുടൻ വലിയ സ്ഥാനമാനങ്ങൾ ലഭിക്കില്ലെങ്കിലും വരാനിരിക്കുന്ന നിയമസഭാ തിരഞ്ഞെടുപ്പിൽ സജീവമാവുകയും പാർട്ടിയോടുള്ള കൂറ് തെളിയിക്കുകയും ചെയ്താൽ ഭാവിയിൽ അർഹമായ പരിഗണന ലഭിക്കുമെന്ന് ഉറപ്പാണ്. കോൺഗ്രസിൽ ദീർഘകാല പാരമ്പര്യവും വേരുകളും സൗഹൃദബന്ധങ്ങളും ഉള്ളവർ, തങ്ങൾ മരിക്കുമ്പോൾ ചുവന്ന പതാകയാണോ അതോ ത്രിവർണ്ണ പതാകയാണോ പുതയ്ക്കേണ്ടതെന്ന് ആലോചിക്കുന്നത് നന്നായിരിക്കുമെന്നും ചെറിയാൻ ഫിലിപ്പ് പറഞ്ഞു.
ഇടതുമുന്നണിയിൽ അവഗണിക്കപ്പെടുന്ന പഴയകാല കോൺഗ്രസ് നേതാക്കളെ ലക്ഷ്യം വെച്ചാണ് ചെറിയാൻ ഫിലിപ്പിന്റെ ഈ തുറന്ന പ്രതികരണം. നിയമസഭാ തിരഞ്ഞെടുപ്പ് ആസന്നമായിരിക്കെ, രാഷ്ട്രീയ മാറ്റങ്ങൾ ആഗ്രഹിക്കുന്നവർക്ക് കോൺഗ്രസിന്റെ വാതിലുകൾ തുറന്നുകിടക്കുകയാണെന്ന സൂചനയാണ് ഇതിലൂടെ ലഭിക്കുന്നത്. ഇടതുപക്ഷത്തെ നിലവിലെ സാഹചര്യം പരിതാപകരമാണെന്നും അവിടെ തുടരുന്നത് രാഷ്ട്രീയ ആത്മഹത്യയ്ക്ക് തുല്യമാണെന്നും അദ്ദേഹം കൂട്ടിച്ചേർത്തു.
