കെയ്റോ/ജറൂസലേം: ഇസ്രായേലിലെ പ്രധാന ആണവ ഗവേഷണ കേന്ദ്രത്തിന് സമീപമുള്ള പ്രദേശങ്ങളിൽ ഇറാൻ നടത്തിയ മിസൈൽ ആക്രമണത്തിൽ വൻ നാശനഷ്ടം. നിരവധി പേർക്ക് പരിക്കേറ്റിട്ടുണ്ട്. യുദ്ധം മൂന്ന് ആഴ്ച പിന്നിടുന്ന സാഹചര്യത്തിൽ ഈ ആക്രമണം നിർണ്ണായക ഘട്ടമായാണ് വിലയിരുത്തുന്നത്.
തെക്കൻ ഇസ്രായേലിലെ ദിമോണയും അരാദും നഗരങ്ങളെയാണ് ഇറാൻ ലക്ഷ്യമിട്ടത്. ഈ പ്രദേശത്താണ് ഇസ്രായേലിന്റെ പ്രധാന ആണവ ഗവേഷണ കേന്ദ്രം സ്ഥിതി ചെയ്യുന്നത്. ഇറാൻ പ്രയോഗിച്ച മിസൈലുകൾ തടയാൻ പ്രതിരോധ സംവിധാനങ്ങൾക്ക് സാധിച്ചില്ലെന്ന് ഇസ്രായേൽ സൈന്യം അറിയിച്ചു. മിസൈലുകൾ നേരിട്ട് ലക്ഷ്യസ്ഥാനങ്ങളിൽ പതിച്ചു. പരിക്കേറ്റവരെ ആശുപത്രികളിലേക്ക് മാറ്റിയിട്ടുണ്ട്. ചിലരുടെ നില ഗുരുതരമാണ്.
‘ടു-സ്റ്റേജ് ഇന്റർകോണ്ടിനെന്റൽ ബാലിസ്റ്റിക് മിസൈൽ’ ആണ് ആക്രമണത്തിൽ ഉപയോഗിച്ചതെന്ന് ഇസ്രായേൽ സൈനിക മേധാവി ജനറൽ ഇയാൽ സാമിർ വ്യക്തമാക്കി. ഇതിലൂടെ ഇറാന്റെ മിസൈൽ ശേഷി വളരെ മുന്നേറ്റം കൈവരിച്ചിട്ടുണ്ടെന്ന് വ്യക്തമാകുന്നു. വരും ദിവസങ്ങളിൽ ആക്രമണം കൂടുതൽ ശക്തമാക്കുമെന്നും യുദ്ധം ഉടൻ അവസാനിക്കില്ലെന്നും ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് അറിയിച്ചു. ഇറാന്റെ ആണവ കേന്ദ്രങ്ങൾക്കെതിരെ നടന്ന ആക്രമണങ്ങൾക്ക് മറുപടിയായാണ് ഈ നീക്കം.
പശ്ചിമേഷ്യയിൽ സംഘർഷം കൂടുതൽ രൂക്ഷമാകുന്നത് ആഗോളതലത്തിൽ ആശങ്ക വർധിപ്പിച്ചിരിക്കുകയാണ്. ഇതിനിടെ യുദ്ധം അവസാനിപ്പിക്കാൻ അമേരിക്ക ശ്രമം ആരംഭിച്ചതായും റിപ്പോർട്ടുകളുണ്ട്. സമാധാനം വേണമെന്ന് ഡൊണാൾഡ് ട്രംപ് അഭിപ്രായപ്പെട്ടതായും വിവരം ലഭിക്കുന്നു.
