തിരുവനന്തപുരം: നിയമസഭാ തിരഞ്ഞെടുപ്പിനു നാമനിര്ദേശപത്രിക നല്കാനുള്ള സമയപരിധി അവസാനിച്ചു. 140 മണ്ഡലങ്ങളിലായി ഇതുവരെ 1269 പത്രികകളാണ് സമര്പ്പിച്ചിരിക്കുന്നത്. നാളെയാണു സൂക്ഷ്മപരിശോധന നടക്കുന്നത് . 26 വരെ പത്രിക പിന്വലിക്കാം. അതോടെ സംസ്ഥാനത്ത് തിരഞ്ഞെടുപ്പിന്റെ അന്തിമചിത്രം തെളിയും. തിരഞ്ഞെടുപ്പ് പ്രഖ്യാപനത്തിനു ശേഷം 6 പ്രവൃത്തിദിവസം മാത്രമാണ് പത്രിക സമര്പ്പണത്തിന് സമയം ഉണ്ടായിരുന്നത്.
പോളിങ് ഉദ്യോഗസ്ഥരില് പ്രിസൈഡിങ് ഓഫിസര്മാര്, ഫസ്റ്റ് പോളിങ് ഓഫിസര് എന്നിവര്ക്കുള്ള ആദ്യഘട്ട പരിശീലനം നാളെ മുതല് 29 വരെ നടക്കും. രണ്ടാംഘട്ട പരിശീലനം നടക്കുന്ന കേന്ദ്രത്തില് വോട്ടു രേഖപ്പെടുത്താനുള്ള വോട്ടര് ഫെസിലിറ്റേഷന് സെന്റര് (വിഎഫ്സി) ക്രമീകരിക്കും. രണ്ടും മൂന്നും പോളിങ് ഓഫിസര്മാര്ക്കുള്ള പരിശീലനം രണ്ടാംഘട്ടത്തില് മാത്രമായി പരിമിതപ്പെടുത്തിയിട്ടുണ്ട്. 140 മണ്ഡലങ്ങളിലെ റിട്ടേണിങ് ഓഫിസര് മാര്ക്കുള്ള രണ്ടാംഘട്ട പരിശീലനവും പൂര്ത്തിയായി.
