കൊച്ചി: സ്ത്രീകളുടെ പ്രസവത്തെക്കുറിച്ചുള്ള റിയാലിറ്റി ഷോ താരവും ട്വന്റി 20 സ്ഥാനാര്ഥിയുമായിരുന്ന അഖില് മാരാരുടെ പരാമര്ശത്തില് പരാതി നല്കി വനിതാ ഡോക്ടര്. സ്ത്രീകളുടെ പ്രസവം സങ്കീര്ണ്ണമാക്കിയത് ആശുപത്രികളാണെന്ന വസ്തുതാ വിരുദ്ധ പരാമര്ശം സമൂഹത്തില് പ്രചരിപ്പിക്കുകയെന്ന ഉദ്ദേശത്തോടെ നടത്തിയ പ്രസ്താവനയില് നടപടി എടുക്കണമെന്നാണ് ആവശ്യം. ആരോഗ്യ വകുപ്പിലെ മെഡിക്കല് ഓഫീസറായ ഡോ. കെ. പ്രതിഭ ചീഫ് സെക്രട്ടറിക്കാണ് പരാതി നല്കിയത്.
നിലവിലുള്ള ആരോഗ്യ സംരക്ഷണ സംവിധാനത്തിന് മേല് പൊതു സമൂഹത്തില് തെറ്റിദ്ധാരണകള് ഉണ്ടാക്കുവാന് ശ്രമം നടത്തിയ അഖില് മാരാര്ക്ക് എതിരെ കേരള പൊതു ജനാരോഗ്യ നിയമത്തിലെ വകുപ്പ് ഉള്പ്പെടുത്തി നടപടി സ്വീകരിക്കണമെന്ന് പരാതിയില് ആവശ്യപ്പെടുന്നു. പ്രസവത്തെ പറ്റിയുള്ള അഖില് മാരാരുടെ പരാമര്ശം വലിയ ചര്ച്ചകള്ക്ക് വഴിവെച്ചിരുന്നു.
