പുനലൂർ: 2026ലെ നിയമസഭാ തിരഞ്ഞെടുപ്പിൽ പുനലൂർ നിയോജക മണ്ഡലത്തിൽ എൽഡിഎഫ് സ്ഥാനാർഥി സി. അജയപ്രസാദ് വൻ വിജയം നേടി. 21,529 വോട്ടുകളുടെ ഭൂരിപക്ഷത്തിലാണ് അദ്ദേഹത്തിന്റെ ജയം. അജയപ്രസാദ് 71,944 വോട്ടുകൾ നേടിയപ്പോൾ യുഡിഎഫ് സ്ഥാനാർഥി നൗഷാദ് യൂനൂസ് 50,415 വോട്ടുകളും എൻഡിഎ സ്ഥാനാർഥി രഘുനാഥ് കുമുകുംചേരി 15,393 വോട്ടുകളും നേടി.
പുനലൂർ മുനിസിപ്പാലിറ്റിയും പത്തനാപുരം താലൂക്കിലെ ആര്യങ്കാവ്, തെന്മല, കുളത്തൂപ്പുഴ, ഏരൂർ, കരവാളൂർ, അഞ്ചൽ, ഇടമുളയ്ക്കൽ എന്നീ പഞ്ചായത്തുകളും ഉൾപ്പെട്ടതാണ് പുനലൂർ നിയമസഭ മണ്ഡലം. ചരിത്രപരമായി ഇടതുപക്ഷത്തിന് ശക്തമായ അടിത്തറയുള്ള മണ്ഡലമാണിത്. 1982, 1984 വർഷങ്ങളിൽ കേരള കോൺഗ്രസ് (ജേക്കബ്) വിഭാഗവും 1991ൽ കോൺഗ്രസും ജയിച്ചിട്ടുണ്ടെങ്കിലും ബാക്കി എല്ലാ തിരഞ്ഞെടുപ്പുകളിലും സിപിഐയാണ് ഇവിടെ വിജയിച്ചത്. കഴിഞ്ഞ നിയമസഭാ തിരഞ്ഞെടുപ്പിലും ഇടതുപക്ഷം വ്യക്തമായ ഭൂരിപക്ഷത്തിൽ മണ്ഡലം നിലനിർത്തിയിരുന്നു.
2011ലെ തെരഞ്ഞെടുപ്പിൽ സിപിഐ സ്ഥാനാർഥിയായ കെ. രാജു 72,648 വോട്ടുകൾ നേടി വിജയിച്ചിരുന്നു. കോൺഗ്രസിന്റെ ജോൺസൺ എബ്രഹാം 54,643 വോട്ടുകൾ നേടിയപ്പോൾ 18,005 വോട്ടുകളുടെ ഭൂരിപക്ഷത്തിലാണ് രാജുവിന്റെ ജയം. 2016ലും കെ. രാജുവാണ് ഇടതുപക്ഷത്തിനായി മത്സരിച്ചത്. യുഡിഎഫ് മുസ്ലിം ലീഗ് സ്ഥാനാർഥിയെ രംഗത്തിറക്കിയപ്പോൾ യൂനൂസ് കുഞ്ഞിന് 48,554 വോട്ടുകൾ ലഭിച്ചിരുന്നു.
2021ലെ തെരഞ്ഞെടുപ്പിൽ സിപിഐക്കുവേണ്ടി പി.എസ്. സുപാൽ മത്സരിച്ച് 37,057 വോട്ടുകളുടെ ഭൂരിപക്ഷത്തിൽ വിജയിച്ചു. മുസ്ലിം ലീഗിന്റെ അബ്ദുറഹിമാൻ രണ്ടത്താണിയായിരുന്നു പ്രധാന എതിരാളി.
ഇത്തവണ യുഡിഎഫിനായി മുസ്ലിം ലീഗിലെ നൗഷാദ് യൂനൂസാണ് മത്സരിച്ചത്. ലീഗിന് സീറ്റ് നൽകിയത് സംബന്ധിച്ച് കോൺഗ്രസ് അകത്ത് വിവാദങ്ങൾ ഉയർന്നിരുന്നു. ഡിസിസി ജനറൽ സെക്രട്ടറി സഞ്ജയ് ഖാൻ പ്രതിഷേധവുമായി രംഗത്തെത്തുകയും വിമതനായി മത്സരിക്കാനുള്ള നീക്കങ്ങൾ നടത്തുകയും ചെയ്തിരുന്നു. എന്നാൽ എഐസിസി നേതൃത്വത്തിന്റെ ഇടപെടലിനെ തുടർന്ന് അവ അവസാനിപ്പിക്കപ്പെട്ടു. ഒടുവിൽ ശക്തമായ പോരാട്ടത്തിനൊടുവിൽ എൽഡിഎഫ് വീണ്ടും മണ്ഡലം നിലനിർത്തി.
