കൊച്ചി: എറണാകുളം പിറവത്ത് പാർക്ക് ഇടിഞ്ഞ് താണു. പാഴൂർ ആറ്റുതീരം പാർക്കിന്റെ 200 മീറ്ററോളം ഭാഗമാണ് മൂവാറ്റുപുഴയാറിലേക്ക് ഇടിഞ്ഞത്. ഇന്ന് രാവിലെയാണ് അപകടമുണ്ടായത്.

പാർക്കിന്റെ വലിയൊരു ഭാഗം ഇടിഞ്ഞതോടെ പ്രദേശത്ത് ആശങ്ക നിലനിൽക്കുകയാണ്. ഇനിയും പാർക്കിന്റെ കൂടുതൽ ഭാഗങ്ങൾ ഇടിയാൻ സാധ്യതയുണ്ടെന്നാണ് വിലയിരുത്തൽ. അപകടസമയത്ത് പാർക്കിൽ ആളുകളില്ലാതിരുന്നതിനാൽ വലിയ ദുരന്തം ഒഴിവായി.

നവീകരിച്ച പാർക്കിൽ സാധാരണയായി രാവിലെ നിരവധിയാളുകൾ എത്താറുണ്ട്. എന്നാൽ അപകടം നടന്ന സമയത്ത് സന്ദർശകരില്ലാതിരുന്നതാണ് ആശ്വാസമായത്.

കൂടുതൽ ഭാഗങ്ങൾ ഇടിയാൻ സാധ്യതയുള്ളതിനാൽ പാർക്കിലേക്കുള്ള പ്രവേശനം അധികൃതർ നിരോധിച്ചു. പ്രദേശത്ത് ആവശ്യമായ സുരക്ഷാ ക്രമീകരണങ്ങളും ഏർപ്പെടുത്തിയിട്ടുണ്ട്.