വസ്ത്രത്തിന് ചേരുന്ന നിറത്തിലുള്ള ബാഗും ചെരുപ്പും തിരഞ്ഞെടുക്കാൻ മണിക്കൂറുകൾ ചെലവഴിക്കുന്ന ശീലം നമുക്കിടയിൽ പണ്ടേയുള്ളതാണ്. ഓരോ വസ്ത്രത്തിനും ഇണങ്ങുന്ന ആക്സസറീസും ചെരുപ്പും തേടി കടകൾ തോറും കയറിയിറങ്ങുന്നവരാണെങ്കിൽ ആ ശീലങ്ങളൊക്കെ മാറ്റാൻ സമയമായിരിക്കുന്നു. ഫാഷൻ ലോകം ഇപ്പോൾ ‘മാച്ചിങ്’ എന്ന പരമ്പരാഗത രീതി ഉപേക്ഷിച്ച് ‘മിസ്മാച്ചിങ്ങിന്റെ’ പിന്നാലെയാണ്. വിദേശ രാജ്യങ്ങളിലും സോഷ്യൽ മീഡിയയിലും ഇപ്പോൾ തരംഗമാകുന്ന ‘റോങ് ഷൂ തിയറി’ എന്ന പുത്തൻ ട്രെൻഡിനെക്കുറിച്ചാണ് ഫാഷൻ പ്രേമികൾക്കിടയിലെ സംസാരവിഷയം. ധരിക്കുന്ന വസ്ത്രത്തിന് ഒട്ടും യോജിക്കാത്ത തരത്തിലുള്ള ചെരിപ്പുകൾ ധരിക്കുക എന്നതാണ് ഈ രസകരമായ ഫാഷൻ രീതിയുടെ അടിസ്ഥാനം.
പ്രശസ്ത ഫാഷൻ സ്റ്റൈലിസ്റ്റ് ആലിസൺ ബോൺസ്റ്റീൻ ജനപ്രിയമാക്കിയ ഈ ആശയം പേര് സൂചിപ്പിക്കുന്നത് പോലെ തന്നെ തികച്ചും വൈരുധ്യങ്ങൾ നിറഞ്ഞതാണ്. ഒരു വസ്ത്രത്തോടൊപ്പം സാധാരണ ഗതിയിൽ നമ്മൾ ധരിക്കാൻ സാധ്യതയില്ലാത്ത അഥവാ ആ വസ്ത്രത്തിന് ഒട്ടും ചേരാത്ത ചെരുപ്പുകൾ ബോധപൂർവം തിരഞ്ഞെടുക്കുന്നതാണ് ഈ രീതിയുടെ പ്രത്യേകത. ഉദാഹരണത്തിന്, വളരെ ഫോർമലായ ഒരു പാന്റ്സ് സ്യൂട്ടിനൊപ്പം ഹീൽസുകളോ ഓക്സ്ഫോർഡ് ഷൂസോ ധരിക്കുന്നതിന് പകരം വളരെ ലളിതമായ ഒരു ഫ്ലിപ്പ് ഫ്ലോപ്പോ സ്ലിപ്പറോ ധരിക്കുക. അതുപോലെ അതിമനോഹരമായ ഒരു പാർട്ടി വസ്ത്രത്തോടൊപ്പം ഭാരമേറിയ സ്പോർട്സ് ഷൂസ് ധരിക്കുന്നതും ഈ ട്രെൻഡിന്റെ ഭാഗമാണ്. ഇത്തരം അപ്രതീക്ഷിതമായ വൈരുധ്യങ്ങളാണ് വസ്ത്രധാരണത്തിന് കൂടുതൽ മിഴിവും വ്യത്യസ്തതയും നൽകുന്നത്.
എല്ലാം കൃത്യമായി മാച്ച് ചെയ്യുമ്പോൾ അത് വസ്ത്രം ധരിച്ച വ്യക്തിയെക്കാൾ വസ്ത്രത്തിന് കൂടുതൽ പ്രാധാന്യം നൽകുന്നു എന്നതാണ് ഈ തിയറി മുന്നോട്ട് വെക്കുന്ന നിരീക്ഷണം. എന്നാൽ തീർത്തും വിഭിന്നമായ ഒരു ഷൂ തിരഞ്ഞെടുക്കുമ്പോൾ, അത് കാഴ്ചക്കാരുടെ ശ്രദ്ധ പെട്ടെന്ന് ആകർഷിക്കുകയും നിങ്ങളുടെ ലുക്കിന് ഒരു ‘പേഴ്സണൽ ടച്ച്’ നൽകുകയും ചെയ്യുന്നു. ലണ്ടനിലെയും പാരീസിലെയും ഫാഷൻ റൺവേകളിൽ നിന്ന് തുടങ്ങിയ ഈ മാറ്റം ഇപ്പോൾ സാധാരണക്കാരുടെ ഫാഷൻ സെൻസിലും ദൃശ്യമാണ്. നമ്മുടെ വസ്ത്രധാരണ രീതി എത്രത്തോളം ആത്മവിശ്വാസത്തോടെ നാം അവതരിപ്പിക്കുന്നു എന്നതിലാണ് ഫാഷന്റെ വിജയം ഇരിക്കുന്നത്.
ഇന്ത്യൻ വസ്ത്രധാരണ രീതിയിലും ‘റോങ് ഷൂ തിയറി’ ഇപ്പോൾ വ്യാപകമായി പരീക്ഷിക്കപ്പെടുന്നുണ്ട്. ആലിയ ഭട്ട് ഉൾപ്പെടെയുള്ള പ്രമുഖ താരങ്ങൾ ലെഹങ്കയ്ക്കൊപ്പം കംഫർട്ടബിൾ ആയ സ്നീക്കറുകൾ ധരിച്ച് ഈ ട്രെൻഡിന് വലിയ സ്വീകാര്യത നൽകിയിരുന്നു. സാരിയ്ക്കൊപ്പം സ്നീക്കറുകൾ പരീക്ഷിക്കുന്നത് ഇപ്പോൾ വലിയൊരു ഫാഷൻ സ്റ്റേറ്റ്മെന്റാണ്. പ്രത്യേകിച്ച് കോട്ടൺ സാരികൾക്കൊപ്പം ബൂട്ട്സോ സ്നീക്കറുകളോ ധരിക്കുന്നത് ലുക്കിനെ മൊത്തത്തിൽ മാറ്റുകയും ധരിക്കുന്ന വ്യക്തിക്ക് കൂടുതൽ കംഫർട്ട് നൽകുകയും ചെയ്യുന്നു. പരമ്പരാഗത രീതികളിൽ നിന്ന് മാറി നടക്കാൻ ആഗ്രഹിക്കുന്ന പുതുതലമുറ ഈ ട്രെൻഡിനെ ഇരുകൈയും നീട്ടിയാണ് സ്വീകരിച്ചിരിക്കുന്നത്.
ഫാഷൻ എന്നാൽ കേവലം മറ്റുള്ളവരെ കാണിക്കാനുള്ളതല്ലെന്നും അത് ഓരോ വ്യക്തിയുടെയും കംഫർട്ടിനും താല്പര്യത്തിനും അനുസരിച്ചുള്ള ഒന്നാണെന്നുമാണ് ഈ ‘റോങ് ഷൂ തിയറി’ ലോകത്തോട് വിളിച്ചുപറയുന്നത്. മുമ്പ് ‘ചേരുന്നില്ല’ എന്ന് കരുതി മാറ്റിവെച്ചിരുന്ന പല കോമ്പിനേഷനുകളും ഇന്ന് സ്റ്റൈലിഷ് ആയി മാറിയിരിക്കുന്നു. അപ്രതീക്ഷിതമായ തിരഞ്ഞെടുപ്പുകൾ നടത്തുന്നതിലൂടെ സ്വന്തമായൊരു വ്യക്തിത്വം വസ്ത്രധാരണത്തിൽ കൊണ്ടുവരാൻ സാധിക്കുന്നു. അടുത്ത തവണ പുറത്തിറങ്ങുമ്പോൾ കണ്ണാടിയിൽ നോക്കി ‘ഇത് ചേരുന്നില്ലല്ലോ’ എന്ന് തോന്നുന്ന ചെരുപ്പ് ധരിക്കാൻ ധൈര്യം കാണിക്കൂ, ഒരുപക്ഷേ അതാകാം നിങ്ങളുടെ ഏറ്റവും മികച്ച ഫാഷൻ സ്റ്റേറ്റ്മെന്റായി മാറാൻ പോകുന്നത്. മാച്ചിംഗിന്റെ പരിമിതികളിൽ നിന്ന് പുറത്തുകടന്ന് വൈവിധ്യങ്ങളുടെ ഫാഷൻ ലോകത്തേക്ക് ചുവടുവെക്കാൻ ഈ പുതിയ തിയറി പ്രേരിപ്പിക്കുന്നു.
