‘ദ ഫാമിലി മാൻ’ എന്ന സീരീസിലൂടെ പ്രശസ്തനായ നടൻ ഷാരിബ് ഹാഷ്മി തന്റെ ജീവിതത്തിലെ വലിയൊരു പ്രതിസന്ധിയെക്കുറിച്ച് മനസുതുറക്കുന്നു. തന്റെ ഭാര്യ നസ്റീൻ കഴിഞ്ഞ കുറേ വർഷങ്ങളായി നേരിടുന്ന കാൻസർ രോഗത്തെയും അത് കുടുംബത്തെ എങ്ങനെ ബാധിച്ചുവെന്നും ഹൗട്ടർഫ്ലൈയ്ക്ക് നൽകിയ അഭിമുഖത്തിൽ അദ്ദേഹം വെളിപ്പെടുത്തി. 2018-ൽ ആദ്യമായി രോഗം സ്ഥിരീകരിച്ച നസ്റീൻ, അഞ്ച് തവണയാണ് ഓറൽ കാൻസറിനെ അതിജീവിച്ചത്. എന്നാൽ നിർഭാഗ്യവശാൽ ആറാം തവണയും രോഗം തിരിച്ചെത്തിയിരിക്കുകയാണ്. രോഗാവസ്ഥയെ തുടർന്ന് അഞ്ച് തവണ ശസ്ത്രക്രിയയ്ക്ക് വിധേയയായ നസ്റീന്റെ ശരീരത്തിൽ ഇത്തവണ രോഗം പടർന്നിട്ടുണ്ടെന്നും അദ്ദേഹം സൂചിപ്പിച്ചു.

എത്ര വലിയ പ്രതിസന്ധികളിലും തളരാതെ പോരാടുന്ന നസ്റീന്റെ കരുത്താണ് തങ്ങളുടെ കുടുംബത്തിന്റെ ആത്മവിശ്വാസമെന്ന് ഷാരിബ് പറഞ്ഞു. മുൻപ് അഞ്ച് തവണയും രോഗത്തെ അതിജീവിച്ചതുപോലെ ഇത്തവണയും ഈ ഘട്ടം കടന്നുപോകുമെന്ന് അദ്ദേഹം പ്രത്യാശ പ്രകടിപ്പിച്ചു. 2003-ൽ വിവാഹിതരായ ഇവർക്ക് രണ്ട് മക്കളാണുള്ളത്. അടുത്തിടെ ഹുമാ ഖുറേഷി നായികയായ ‘തർല’ എന്ന ചിത്രത്തിലും ‘സാരാ ഹട്കെ സാരാ ബച്ച്കെ’ എന്ന സിനിമയിലും ഷാരിബ് ശ്രദ്ധേയമായ വേഷങ്ങൾ കൈകാര്യം ചെയ്തിരുന്നു. തന്റെ അഭിനയ ജീവിതത്തിനൊപ്പം തന്നെ കുടുംബത്തിന്റെ ഈ വലിയ അതിജീവന പോരാട്ടത്തിനും പിന്തുണയുമായി ഷാരിബ് ഒപ്പമുണ്ട്.