കൊച്ചി: വ്യാജരേഖകൾ ചമച്ച് അവയവ വിൽപ്പന നടത്തിയ അന്തർസംസ്ഥാന റാക്കറ്റിലെ ഒരു പ്രതിയെ കൂടി പൊലീസ് അറസ്റ്റ് ചെയ്തു. കോട്ടയം സ്വദേശിനിയായ യുവതിയെയാണ് കൊച്ചി ഡി.സി.പി.യുടെ നേതൃത്വത്തിലുള്ള പ്രത്യേക അന്വേഷണ സംഘം പിടികൂടിയത്. കൊച്ചി അമ്പലമേട് പൊലീസ് സ്റ്റേഷനിൽ രജിസ്റ്റർ ചെയ്ത കേസിലാണ് നടപടി.
മുംബൈയിലെ അവയവ സ്വീകരിക്കുന്ന വ്യക്തിയുടെ അടുത്ത ബന്ധുവാണെന്ന് തെളിയിക്കുന്ന വ്യാജരേഖകൾ നിർമ്മിച്ചത് ഇവരാണെന്ന് പൊലീസ് കണ്ടെത്തി. കേസിലെ മുഖ്യപ്രതിയായ നജീബ് ഉൾപ്പെടെയുള്ളവരെ നേരത്തെ കസ്റ്റഡിയിൽ വാങ്ങി ചോദ്യം ചെയ്തതിൽ നിന്നാണ് യുവതിയുടെ പങ്ക് വ്യക്തമായത്.
വിദേശത്തും വിവിധ സംസ്ഥാനങ്ങളിലും ബന്ധങ്ങളുള്ള സംഘടിത കുറ്റകൃത്യ ശൃംഖലയാണ് ഇതിന് പിന്നിലുള്ളതെന്ന് കൊച്ചി സിറ്റി പൊലീസ് കമ്മീഷണർ കാളിരാജ് മഹേഷ്കുമാർ അറിയിച്ചു. മുഖ്യസൂത്രധാരനായ നജീബിൽ നിന്ന് നിർണായകമായ ഡിജിറ്റൽ തെളിവുകൾ അന്വേഷണസംഘം കണ്ടെത്തിയിട്ടുണ്ട്. ഇയാളുടെ പാസ്പോർട്ടും മൊബൈൽ ഫോണും നേരത്തെ തന്നെ പിടിച്ചെടുത്തിരുന്നു.
കേസുമായി ബന്ധപ്പെട്ട് വരും ദിവസങ്ങളിൽ കൂടുതൽ അറസ്റ്റുകൾ ഉണ്ടാകുമെന്നാണ് പൊലീസ് സൂചന. അന്വേഷണം മറ്റ് സംസ്ഥാനങ്ങളിലേക്കും വ്യാപിപ്പിച്ചിട്ടുണ്ട്. പിടിച്ചെടുത്ത ഡിജിറ്റൽ രേഖകൾ സൈബർ സെല്ലിന്റെ സഹായത്തോടെ വിശദമായി പരിശോധിക്കുകയാണ്.
റിമാൻഡിലുള്ള നജീബിനെ വീണ്ടും കസ്റ്റഡിയിൽ വാങ്ങി ചോദ്യം ചെയ്യുന്നതോടെ കൂടുതൽ പ്രതികളെക്കുറിച്ച് വിവരങ്ങൾ ലഭിക്കുമെന്ന് ആലുവ റൂറൽ എസ്.പി. കെ.എസ്. സുദർശൻ അറിയിച്ചു.
