ന്യൂഡൽഹി: കോക്രോച്ച് ജനതാ പാർട്ടിയുമായി ബന്ധപ്പെട്ട ഹർജികളിൽ അടിയന്തര ഇടപെടൽ ആവശ്യമില്ലെന്ന് സുപ്രീം കോടതി വ്യക്തമാക്കി. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച്, വിഷയത്തിൽ ഇപ്പോൾ അടിയന്തര സാഹചര്യമില്ലെന്നും ഹർജികൾ സാധാരണ നടപടിക്രമങ്ങളിലൂടെ പിന്നീട് പരിഗണിക്കാമെന്നും നിരീക്ഷിച്ചു. ജസ്റ്റിസുമാരായ ജോയ്മല്യ ബാഗ്ചി, വി.എം. പഞ്ചോളി എന്നിവരാണ് ബെഞ്ചിലെ മറ്റ് അംഗങ്ങൾ.
കേസുമായി ബന്ധപ്പെട്ട വാദത്തിനിടെ, വിഷയത്തിൽ അതിരുകടന്ന വികാരപ്രകടനം ആവശ്യമില്ലെന്ന് കോടതി അഭിഭാഷകരോട് വ്യക്തമാക്കി.
വ്യാജ നിയമ ബിരുദങ്ങളും സീനിയർ അഡ്വക്കേറ്റ് പദവികളും സംബന്ധിച്ച കേസിൽ നടത്തിയ ചില നിരീക്ഷണങ്ങളാണ് വിവാദങ്ങൾക്ക് തുടക്കമിട്ടത്. തൊഴിലില്ലാത്ത യുവാക്കളെ “പാറ്റകളോട്” ഉപമിച്ചെന്ന തരത്തിലുള്ള പരാമർശങ്ങൾ സാമൂഹിക മാധ്യമങ്ങളിൽ പ്രതിഷേധത്തിന് ഇടയാക്കിയിരുന്നു.
ഇതിനെതിരെ പ്രതിഷേധമായി രൂപം കൊണ്ട ‘കോക്രോച്ച് ജനതാ പാർട്ടി’യുടെ പ്രവർത്തനങ്ങളെക്കുറിച്ച് സി.ബി.ഐ അന്വേഷണം ആവശ്യപ്പെട്ടുള്ള ഹർജികളും കോടതിയിൽ എത്തി. എന്നാൽ ഇപ്പോൾ അവ അടിയന്തരമായി പരിഗണിക്കേണ്ട സാഹചര്യമില്ലെന്ന് കോടതി വ്യക്തമാക്കിയതായി റിപ്പോർട്ടുകൾ പറയുന്നു.
