ഇന്ഡോര്: മധ്യപ്രദേശിലെ ഇന്ഡോറില് കടുത്ത ജലക്ഷാമത്തെ തുടര്ന്ന് വ്യാപക പ്രതിഷേധം. കുടിവെള്ള വിതരണം പുനസ്ഥാപിക്കണമെന്ന് ആവശ്യപ്പെട്ട് നഗരവാസികള് തെരുവിലിറങ്ങിയതോടെ പ്രദേശത്ത് സംഘര്ഷാവസ്ഥ ഉണ്ടായി. പ്രതിപക്ഷമായ കോണ്ഗ്രസ് പ്രതിഷേധങ്ങള്ക്ക് നേതൃത്വം നല്കി.
42 ഡിഗ്രി സെല്ഷ്യസ് വരെ ഉയര്ന്ന കടുത്ത ചൂടിനിടെയാണ് 85 വാര്ഡുകളില് നിന്നുള്ള ആളുകള് നഗരത്തിലെ വിവിധ കേന്ദ്രങ്ങളില് പ്രതിഷേധ പ്രകടനം നടത്തിയത്. രാജ്വാഡയും പാല്ഡ സ്ക്വയറും ഉള്പ്പെടെ പ്രധാന പ്രദേശങ്ങളില് രണ്ട് ദിവസത്തിനിടെ വലിയ പ്രതിഷേധങ്ങള് നടന്നു.
പ്രതിഷേധം നിയന്ത്രിക്കാന് പൊലീസ് ജലപീരങ്കി ഉപയോഗിച്ചത് വിവാദമായി. കുടിവെള്ളം നല്കാനില്ലാത്ത ഭരണകൂടം പ്രതിഷേധക്കാരെ നിയന്ത്രിക്കാന് ജലപീരങ്കി ഉപയോഗിച്ചതിനെതിരെ കോണ്ഗ്രസ് ശക്തമായ വിമര്ശനം ഉന്നയിച്ചു.
അതേസമയം, പ്രതിഷേധങ്ങളെ “രാഷ്ട്രീയ നാടകം” എന്നാണ് ഇന്ഡോര് മേയര് പുഷ്യമിത്ര ഭാര്ഗവ് വിശേഷിപ്പിച്ചത്. കോണ്ഗ്രസ് കൗണ്സിലര്മാരാണ് പ്രതിഷേധങ്ങള്ക്ക് പിന്നിലെന്നും അദ്ദേഹം ആരോപിച്ചു.
ഇന്ഡോര് മുനിസിപ്പല് കോര്പ്പറേഷന് കുടിവെള്ള വിതരണത്തില് പരാജയപ്പെട്ടുവെന്നാണ് കോണ്ഗ്രസ് ആരോപണം. നഗരത്തിലെ ജലവിതരണ പ്രതിസന്ധി പരിഹരിക്കണമെന്ന് ആവശ്യപ്പെട്ടാണ് പ്രതിഷേധങ്ങള് ശക്തമായതെന്നും റിപ്പോര്ട്ടുകള് പറയുന്നു.
ഭഗീരത്പുരയില് വിതരണം ചെയ്ത മലിനജലത്തെ തുടര്ന്ന് 36 പേരുടെ മരണത്തിന് കാരണമായെന്ന് മധ്യപ്രദേശ് കോണ്ഗ്രസ് അധ്യക്ഷന് ജിതു പട്വാരി ആരോപിച്ചതും വിഷയത്തെ കൂടുതല് വിവാദത്തിലാക്കി.
