ബെംഗളൂരു: കർണാടക കോൺഗ്രസിൽ മാസങ്ങളായി നീണ്ടുനിന്നിരുന്ന നേതൃത്വ തർക്കത്തിന് വിരാമമാകുമ്പോൾ, പുതിയ അധികാരസമവാക്യങ്ങളെ ചൊല്ലിയുള്ള ചർച്ചകൾ സജീവമാകുകയാണ്. മുഖ്യമന്ത്രി സ്ഥാനവുമായി ബന്ധപ്പെട്ട അനിശ്ചിതത്വങ്ങൾക്ക് ഒടുവിൽ കോൺഗ്രസ് ഹൈക്കമാൻഡ് ഇടപെട്ടതോടെയാണ് മുൻ ധാരണപ്രകാരം ഡി.കെ. ശിവകുമാർ മുഖ്യമന്ത്രിപദത്തിലേക്ക് എത്താനുള്ള വഴി തെളിഞ്ഞത്.

എന്നാൽ മുഖ്യമന്ത്രി സ്ഥാനത്തെ ചർച്ചകൾ അവസാനിച്ചതോടെ, ഉപമുഖ്യമന്ത്രി സ്ഥാനത്തെ ചൊല്ലിയുള്ള പുതിയ രാഷ്ട്രീയ പോരാട്ടമാണ് പാർട്ടിക്കുള്ളിൽ ഉയരുന്നത്. വിവിധ സമുദായങ്ങളെയും അധികാരകേന്ദ്രങ്ങളെയും തൃപ്തിപ്പെടുത്തുന്നതിനായി ഒന്നിലധികം ഉപമുഖ്യമന്ത്രിമാരെ നിയമിക്കുന്നതിനെക്കുറിച്ച് നേതൃത്വം ആലോചിക്കുന്നതായാണ് സൂചന.

ഈ സാഹചര്യത്തിൽ മുൻ മുഖ്യമന്ത്രി സിദ്ധരാമയ്യയുടെ മകൻ യതീന്ദ്ര സിദ്ധരാമയ്യയുടെയും കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെയുടെ മകൻ പ്രിയങ്ക് ഖാർഗെയുടെയും പേരുകൾ ശ്രദ്ധ നേടുകയാണ്. കർണാടകയിലെ അധികാരവിതരണത്തിൽ ഇരുവരുടെയും പങ്കിനെക്കുറിച്ച് പാർട്ടി വൃത്തങ്ങളിൽ ചർച്ചകൾ സജീവമാണ്.

ഡോക്ടറായിരുന്ന യതീന്ദ്ര സിദ്ധരാമയ്യ 2018-ലാണ് സജീവ രാഷ്ട്രീയത്തിലേക്ക് എത്തിയത്. വരുണ മണ്ഡലത്തിൽനിന്ന് എംഎൽഎയായി തെരഞ്ഞെടുക്കപ്പെട്ട അദ്ദേഹം പിന്നീട് എംഎൽസിയായും പ്രവർത്തിച്ചു. പൊതുവേദികളിൽ അധികം സജീവമല്ലെങ്കിലും സിദ്ധരാമയ്യയുടെ രാഷ്ട്രീയ തന്ത്രങ്ങൾക്ക് പിന്നിലെ പ്രധാന ശക്തികളിലൊരാളായാണ് അദ്ദേഹത്തെ വിലയിരുത്തുന്നത്.

അതേസമയം, പ്രിയങ്ക് ഖാർഗെ കർണാടക കോൺഗ്രസിലെ പ്രമുഖ യുവമുഖങ്ങളിലൊരാളാണ്. എൻഎസ്‌യുഐയിലൂടെയും യൂത്ത് കോൺഗ്രസിലൂടെയും രാഷ്ട്രീയ ജീവിതം ആരംഭിച്ച അദ്ദേഹം മൂന്ന് തവണ എംഎൽഎയായി തെരഞ്ഞെടുക്കപ്പെട്ടിട്ടുണ്ട്. ഐടി, ബയോടെക്‌നോളജി, ഗ്രാമവികസനം, സാമൂഹിക ക്ഷേമം തുടങ്ങിയ പ്രധാന വകുപ്പുകൾ കൈകാര്യം ചെയ്ത അനുഭവസമ്പത്തും അദ്ദേഹത്തിനുണ്ട്.

രാഷ്ട്രീയവും ഭരണപരവുമായ അനുഭവത്തിന്റെ അടിസ്ഥാനത്തിൽ പ്രിയങ്ക് ഖാർഗെയെ ഉപമുഖ്യമന്ത്രി സ്ഥാനത്തേക്കുള്ള ശക്തമായ സ്ഥാനാർഥിയായി പല നേതാക്കളും കാണുന്നുണ്ട്. അതേസമയം, യതീന്ദ്ര സിദ്ധരാമയ്യക്കും പാർട്ടിക്കുള്ളിൽ ഗണ്യമായ സ്വാധീനമുണ്ടെന്നാണ് വിലയിരുത്തൽ.

ജി. പരമേശ്വര, സതീഷ് ജാർക്കിഹോളി, എം.ബി. പാട്ടീൽ, ഈശ്വർ ഖണ്ഡ്രെ, യു.ടി. ഖാദർ, പ്രിയങ്ക് ഖാർഗെ എന്നിവരുടെ പേരുകളും ഉപമുഖ്യമന്ത്രി സ്ഥാനത്തിനായി പരിഗണിക്കപ്പെടുന്നവരുടെ പട്ടികയിലുണ്ട്. ഡി.കെ. ശിവകുമാർ മുഖ്യമന്ത്രിയായി ചുമതലയേൽക്കുന്നതിന് മുമ്പേ തന്നെ ഉപമുഖ്യമന്ത്രി സ്ഥാനത്തെ ചൊല്ലിയുള്ള മത്സരം കർണാടക രാഷ്ട്രീയത്തിലെ പ്രധാന ചർച്ചയായി മാറിയിരിക്കുകയാണ്.