മുംബൈ: മുൻകാല നേട്ടങ്ങളും സീനിയോറിറ്റിയും അന്താരാഷ്ട്ര റെക്കോർഡുകളും പൂർണമായും മാറ്റിനിർത്തി, ഐപിഎൽ 2026 സീസണിലെ പ്രകടനം മാത്രം മാനദണ്ഡമാക്കി ഇന്ത്യയുടെ ടി20 ടീം തെരഞ്ഞെടുത്താൽ അത് എങ്ങനെയായിരിക്കും? പേരിന്റെയോ പ്രശസ്തിയുടെയോ മുൻകാല പ്രകടനങ്ങളുടെയോ സ്വാധീനമില്ലാതെ, ഈ സീസണിലെ ഐപിഎൽ പ്രകടനം മാത്രം കണക്കിലെടുത്തുള്ള 15 അംഗ ഇന്ത്യൻ ടീമിലേക്കുള്ള സാധ്യതകളാണ് ഇവിടെ വിലയിരുത്തുന്നത്.
റോയൽ ചലഞ്ചേഴ്സ് ബെംഗളൂരുവിനെ തുടർച്ചയായ രണ്ടാം കിരീടത്തിലേക്ക് നയിക്കുകയും ബാറ്റിംഗിലും മികച്ച പ്രകടനം കാഴ്ചവെക്കുകയും ചെയ്ത രജത് പാട്ടീദാറായിരിക്കും ടീമിന്റെ നായകൻ. 193-ലധികം സ്ട്രൈക്ക് റേറ്റിൽ 501 റൺസും 42 സിക്സറുകളും നേടിയ താരം നാലാം നമ്പറിലും ഇറങ്ങും.
ഓപ്പണർമാരായി രാജസ്ഥാൻ റോയൽസിന്റെ ഓറഞ്ച് ക്യാപ് ജേതാവായ വൈഭവ് സൂര്യവംശിയും സൺറൈസേഴ്സ് ഹൈദരാബാദിന്റെ അഭിഷേക് ശർമയുമാണ് തിരഞ്ഞെടുക്കപ്പെടുക. 776 റൺസും 72 സിക്സറുകളും 237.30 എന്ന വിസ്മയിപ്പിക്കുന്ന സ്ട്രൈക്ക് റേറ്റും നേടിയ വൈഭവ് ടീമിൽ അനിവാര്യ സാന്നിധ്യമാണ്. 204-ലധികം സ്ട്രൈക്ക് റേറ്റിൽ 563 റൺസ് നേടിയ അഭിഷേകും ഓപ്പണിംഗ് സ്ഥാനത്തേക്ക് ശക്തമായ അവകാശവാദം ഉന്നയിക്കുന്നു.
മൂന്നാം നമ്പറിലും വിക്കറ്റ് കീപ്പറായും എത്തുക 182.42 സ്ട്രൈക്ക് റേറ്റിൽ 602 റൺസ് നേടിയ ഇഷാൻ കിഷനാണ്. ഇതോടെ രണ്ട് സെഞ്ചുറികൾ നേടിയിട്ടും മലയാളി താരം സഞ്ജു സാംസണിന് ആദ്യ ഇലവനിൽ ഇടമില്ലെന്നതാണ് ശ്രദ്ധേയം.
മധ്യനിരയിൽ 498 റൺസ് നേടിയ ശ്രേയസ് അയ്യർ ടീമിന് കരുത്തേകും. ഫിനിഷറുടെ റോളിൽ റിങ്കു സിംഗ് സ്ഥാനമുറപ്പിക്കും.
ഓൾറൗണ്ടർമാരിൽ ഹൈദരാബാദിനായി 302 റൺസും 8 വിക്കറ്റും നേടിയ നിതീഷ് കുമാർ റെഡ്ഡി പേസ് ഓൾറൗണ്ടറായി ഇടം നേടും. 226 റൺസും 14 വിക്കറ്റും നേടിയ ക്രുനാൽ പാണ്ഡ്യ സ്പിൻ ഓൾറൗണ്ടറായി ടീമിലെത്തും. അക്സർ പട്ടേലും ടീമിന്റെ ഓൾറൗണ്ട് വിഭാഗത്തിൽ ഉൾപ്പെടും.
ബൗളിംഗ് നിരയെ നയിക്കുക 28 വിക്കറ്റുകളുമായി സീസണിലെ ഏറ്റവും മികച്ച ഇന്ത്യൻ പേസറായ ഭുവനേശ്വർ കുമാറാണ്. 19 വിക്കറ്റ് നേടിയ മുഹമ്മദ് സിറാജ് അദ്ദേഹത്തിന്റെ പുതിയ ബോൾ പങ്കാളിയാകും. മധ്യ ഓവറുകളിൽ വരുൺ ചക്രവർത്തി സ്പിൻ ആക്രമണത്തിന് നേതൃത്വം നൽകും.
ബാക്കപ്പ് വിക്കറ്റ് കീപ്പറായി 515 റൺസ് നേടിയ ധ്രുവ് ജുറെൽ ടീമിലുണ്ടാകും. 732 റൺസ് നേടിയ ശുഭ്മാൻ ഗിൽ ബാക്കപ്പ് ഓപ്പണറായും വാഷിംഗ്ടൺ സുന്ദർ അധിക സ്പിൻ ഓൾറൗണ്ടറായും ഇടം പിടിക്കും. 21 വിക്കറ്റ് നേടിയ അൻഷുൽ കംബോജ് പേസ് ബാക്കപ്പായും ടീമിലെത്തും.
അതേസമയം, 13 മത്സരങ്ങളിൽ നിന്ന് വെറും നാല് വിക്കറ്റുകൾ മാത്രം നേടിയ ജസ്പ്രീത് ബുംറയ്ക്ക് ബാക്കപ്പ് പേസറായിപ്പോലും ടീമിൽ ഇടം നേടാനായില്ല.
ഐപിഎൽ 2026 പ്രകടനത്തിന്റെ മാത്രം അടിസ്ഥാനത്തിലുള്ള 15 അംഗ ഇന്ത്യൻ ടീം
രജത് പാട്ടീദാർ (ക്യാപ്റ്റൻ), വൈഭവ് സൂര്യവംശി, അഭിഷേക് ശർമ, ഇഷാൻ കിഷൻ (വിക്കറ്റ് കീപ്പർ), ശ്രേയസ് അയ്യർ, ശുഭ്മാൻ ഗിൽ, ധ്രുവ് ജുറെൽ, റിങ്കു സിംഗ്, നിതീഷ് കുമാർ റെഡ്ഡി, ക്രുനാൽ പാണ്ഡ്യ, അക്സർ പട്ടേൽ, ഭുവനേശ്വർ കുമാർ, മുഹമ്മദ് സിറാജ്, അൻഷുൽ കംബോജ്, വരുൺ ചക്രവർത്തി.
