കുവൈത്ത് സിറ്റി: യുണൈറ്റഡ് കിംഗ്ഡത്തിൽ നിന്ന് കുവൈത്തിലേക്ക് ലഹരിമരുന്ന് കടത്താനുള്ള ശ്രമം എയർ കാർഗോ കസ്റ്റംസ് വിഭാഗം പരാജയപ്പെടുത്തി. ഹെയർ ഓയിൽ, ഷാംപൂ, സ്പെയർ പാർട്സ് എന്നിവയെന്ന വ്യാജ വാണിജ്യ വിവരണങ്ങളോടെ എത്തിയ മൂന്ന് ഷിപ്പ്മെന്റുകളിലൂടെയാണ് മയക്കുമരുന്ന് കടത്താൻ ശ്രമം നടന്നത്.
കസ്റ്റംസ് ഉദ്യോഗസ്ഥർ നടത്തിയ സൂക്ഷ്മ പരിശോധനയിൽ ഏകദേശം 5 കിലോഗ്രാം കെമിക്കൽ ലഹരിമരുന്ന് അടങ്ങിയ ദ്രാവകം കണ്ടെത്തി. അതീവ രഹസ്യമായി ഒളിപ്പിച്ചിരുന്ന ഈ വസ്തു, പരിശോധനാ ഏജൻസികളെ വഞ്ചിച്ച് രാജ്യത്തേക്ക് കടത്താനായിരുന്നു ശ്രമമെന്ന് അധികൃതർ വ്യക്തമാക്കി.
പിടിച്ചെടുത്ത വസ്തുക്കൾക്കെതിരെ നിയമനടപടികൾ ആരംഭിച്ചിട്ടുണ്ടെന്നും കേസ് തുടർനടപടികൾക്കായി ബന്ധപ്പെട്ട അധികാരികൾക്ക് കൈമാറുമെന്നും കസ്റ്റംസ് അറിയിച്ചു. പുതിയ തരത്തിലുള്ള കള്ളക്കടത്ത് രീതികളെ തിരിച്ചറിഞ്ഞ് രാജ്യസുരക്ഷ ഉറപ്പാക്കുന്നതിൽ കസ്റ്റംസ് വിഭാഗത്തിന്റെ ജാഗ്രതയും കാര്യക്ഷമതയും നിർണായകമായിരുന്നുവെന്നും അധികൃതർ കൂട്ടിച്ചേർത്തു.
