തിരുവനന്തപുരം: സംസ്ഥാനത്ത് വന്യജീവി-മനുഷ്യ സംഘർഷം പരിഹരിക്കുന്നതിന് സമഗ്രമായ പദ്ധതി തയ്യാറാക്കുമെന്ന് വനം-വന്യജീവി വകുപ്പ് മന്ത്രി ഷിബു ബേബി ജോൺ. കോന്നി, റാന്നി വനമേഖലകളിലെ പ്രശ്നങ്ങൾ വിലയിരുത്തുന്നതിനായി ചേർന്ന അവലോകന യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വന്യമൃഗങ്ങളെ വനത്തിനുള്ളിൽ തന്നെ നിലനിർത്തൽ, പുറത്തേക്കെത്തുന്ന മൃഗങ്ങളുടെ ആഘാതം കുറയ്ക്കൽ, ദുരിതബാധിതർക്ക് സമയബന്ധിത നഷ്ടപരിഹാരം നൽകൽ എന്നിവയാണ് പദ്ധതിയുടെ പ്രധാന ഘടകങ്ങളെന്ന് മന്ത്രി വ്യക്തമാക്കി.
വന്യജീവികൾ നാട്ടിലേക്ക് ഇറങ്ങുന്നത് തടയാൻ വനത്തിനുള്ളിലെ വിഭവലഭ്യത വർധിപ്പിക്കുന്നതിനുള്ള പഠനങ്ങൾ നടത്തും. കിടങ്ങ്, സൗരോർജ വേലി, തൂക്കുവേലി തുടങ്ങിയ സംവിധാനങ്ങൾ ശക്തിപ്പെടുത്തുന്നതിനൊപ്പം പുതിയ ശാസ്ത്രീയ മാർഗങ്ങളും ആവിഷ്കരിക്കുമെന്നും മന്ത്രി പറഞ്ഞു.
നാട്ടിലേക്ക് ഇറങ്ങുന്ന വന്യമൃഗങ്ങളെ ജനങ്ങൾക്ക് അപകടമില്ലാതെ തിരികെ വനത്തിലേക്ക് മാറ്റുന്നതിനുള്ള നടപടികൾ ശക്തമാക്കും. കർഷകർക്ക് ലഭിക്കുന്ന നഷ്ടപരിഹാരം സമയബന്ധിതമായി നൽകുന്നതിനും തുക വർധിപ്പിക്കുന്നതിനും മുഖ്യമന്ത്രിയുമായി ചർച്ച നടത്തുമെന്നും അദ്ദേഹം വ്യക്തമാക്കി.
കൃഷിനാശത്തിന് ഇൻഷുറൻസ് സംവിധാനം കൊണ്ടുവരുന്നതും സർക്കാരിന്റെ ലക്ഷ്യമാണെന്നും പ്രീമിയം കുറഞ്ഞ രീതിയിൽ പൊതുമേഖല ഇൻഷുറൻസ് സ്ഥാപനങ്ങളുമായി ചേർന്ന് പദ്ധതി നടപ്പാക്കുമെന്നും മന്ത്രി പറഞ്ഞു.
സംസ്ഥാനത്തെ വനമേഖലകളെ 12 മേഖലകളായി തിരിച്ച് ഓരോ പ്രദേശത്തിനും പ്രത്യേക പദ്ധതി തയ്യാറാക്കും. കാട്ടുപന്നി നിയന്ത്രണത്തിനായി കൂടുതൽ ഷൂട്ടർമാരെ നിയോഗിക്കുമെന്നും കാട്ടാനകളെ നിയന്ത്രിക്കാൻ ചക്കപ്പഴം ശേഖരിച്ചു സംഭരിക്കുന്ന പദ്ധതിയും ആവിഷ്കരിക്കുമെന്നും മന്ത്രി അറിയിച്ചു.
