കോട്ടയം/കാസർകോട്: സെൻസസ് ഡ്യൂട്ടിക്കായി എത്തിയ രണ്ട് ഉദ്യോഗസ്ഥർക്ക് വ്യത്യസ്ത ജില്ലകളിൽ നായയുടെ കടിയേറ്റു. കോട്ടയത്തും കാസർകോടും ജില്ലകളിലാണ് സംഭവം.
കോട്ടയം അതിരമ്പുഴ മുണ്ടുവേലിപ്പടിയിൽ സെൻസസ് നടപടിക്കായി എത്തിയ ഏറ്റുമാനൂർ സ്വദേശി വി.എസ്. ശ്യാംഗോപാലിനെയാണ് വീട്ടിലെ നായ കടിച്ചത്. വീട്ടിൽ വയോധിക മാത്രമാണ് ഉണ്ടായിരുന്നതെന്ന് വിവരമുണ്ട്. കടിയേറ്റ ശേഷം അദ്ദേഹം അതിരമ്പുഴ പ്രാഥമികാരോഗ്യ കേന്ദ്രത്തിൽ ചികിത്സ തേടി.
കാസർകോട് തൃക്കരിപ്പൂർ തലിച്ചാലത്ത് സെൻസസ് വിവരശേഖരണത്തിനെത്തിയ മുഹമ്മദ് കബീറിനും നായയുടെ കടിയേറ്റു. കൊടുങ്ങല്ലൂർ സ്വദേശിയും ഉടുംബന്തല ജി.എൽ.പി. സ്കൂൾ അധ്യാപകനുമായ മുഹമ്മദ് കബീർ വിവരശേഖരണത്തിനിടയിൽ വീട്ടിലെ വളർത്തുനായ ചങ്ങല പൊട്ടിച്ച് പുറത്തേക്ക് ചാടി ആക്രമിച്ചതായാണ് റിപ്പോർട്ട്.
ഇരുവിഭാഗത്തെയും ഉദ്യോഗസ്ഥർക്ക് ചികിത്സ ലഭ്യമാക്കിയതായും ആരോഗ്യനില തൃപ്തികരമാണെന്നും ബന്ധപ്പെട്ട അധികൃതർ അറിയിച്ചു.
