വിജയ് നായകനായെത്തുന്ന പുതിയ ചിത്രം ‘ജനനായകൻ’ സെൻസറിങ് പൂർത്തിയാക്കി. ചിത്രത്തിന് എ സർട്ടിഫിക്കറ്റാണ് ലഭിച്ചിരിക്കുന്നത്. 13 കട്ടുകളോടെയാണ് സെൻസർ ബോർഡ് അനുമതി നൽകിയിരിക്കുന്നത്.
ചിത്രത്തിന്റെ റിലീസ് തീയതി ഔദ്യോഗികമായി പ്രഖ്യാപിച്ചിട്ടില്ലെങ്കിലും ജൂലൈ 23 അല്ലെങ്കിൽ 24ന് ചിത്രം തിയേറ്ററുകളിൽ എത്തുമെന്ന റിപ്പോർട്ടുകൾ നേരത്തെ പുറത്തുവന്നിരുന്നു. സെൻസറിങ് പൂർത്തിയായ സാഹചര്യത്തിൽ റിലീസ് തീയതി ഉടൻ പ്രഖ്യാപിക്കുമെന്നാണ് പ്രതീക്ഷ. എച്ച്. വിനോദ് സംവിധാനം ചെയ്യുന്ന ‘ജനനായകൻ’ വിജയ് സിനിമാജീവിതത്തിലെ അവസാന ചിത്രമെന്ന പ്രത്യേകതയോടെയാണ് ശ്രദ്ധ നേടുന്നത്. രാഷ്ട്രീയ പ്രവേശനത്തിന് ഒരുങ്ങുന്ന വിജയ്യുടെ അവസാന സിനിമയായിരിക്കും ഇതെന്നാണ് റിപ്പോർട്ടുകൾ.
നേരത്തെ സെൻസർ സർട്ടിഫിക്കറ്റ് ലഭിക്കുന്നതിൽ ഉണ്ടായ വൈകല്യം കാരണം ചിത്രത്തിന്റെ റിലീസ് നീണ്ടിരുന്നു. ഇതിനിടെ ചിത്രത്തിന്റെ വ്യാജ പതിപ്പ് ഓൺലൈനിൽ പ്രചരിച്ചതും വാർത്തയായിരുന്നു. ബോബി ഡിയോൾ, പൂജ ഹെഗ്ഡെ, പ്രകാശ് രാജ്, ഗൗതം വാസുദേവ് മേനോൻ, നരേൻ, പ്രിയാമണി, മമിത തുടങ്ങിയ താരങ്ങളും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്.
കെ.വി.എൻ പ്രൊഡക്ഷൻസിന്റെ ബാനറിൽ വെങ്കട്ട് കെ. നാരായണയാണ് ചിത്രം നിർമ്മിക്കുന്നത്. ചിത്രത്തിന് ഛായാഗ്രഹണം നിർവഹിക്കുന്നത് സത്യൻ സൂര്യനാണ്. ആക്ഷൻ അനിൽ അരശും കലാസംവിധാനം വി. സെൽവ കുമാറുമാണ് കൈകാര്യം ചെയ്യുന്നത്. വിജയ്യുടെ അടുത്ത സംവിധായക സുഹൃത്തുക്കളായ ലോകേഷ് കനകരാജ്, അറ്റ്ലി, നെൽസൺ എന്നിവർ ചിത്രത്തിലെ ഒരു ഗാനരംഗത്തിൽ പ്രത്യക്ഷപ്പെടുമെന്ന റിപ്പോർട്ടുകളും പുറത്തുവന്നിട്ടുണ്ട്.
