തിരുവനന്തപുരം: സ്ത്രീകൾക്കായി കെഎസ്ആർടിസി ആരംഭിച്ച പ്രിയദർശിനി സൗജന്യ യാത്രാ പദ്ധതി ഒരു മാസം പിന്നിടുമ്പോൾ വൻ ജനപിന്തുണ ലഭിച്ചെങ്കിലും കെഎസ്ആർടിസിക്ക് വൻ സാമ്പത്തിക നഷ്ടമുണ്ടായതായി കണക്കുകൾ. പദ്ധതിയുടെ ഭാഗമായി ഇതുവരെ 75 കോടി രൂപയുടെ വരുമാന നഷ്ടമാണ് കെഎസ്ആർടിസിക്ക് ഉണ്ടായത്.
പ്രതിദിനം ശരാശരി 2.5 കോടി രൂപയുടെ വരുമാനം നഷ്ടപ്പെടുന്നതായാണ് കണക്കുകൾ വ്യക്തമാക്കുന്നത്. അതേസമയം, പദ്ധതി നടപ്പാക്കിയതോടെ വനിതാ യാത്രക്കാരുടെ എണ്ണത്തിൽ 40 ശതമാനം വർധനയുണ്ടായി. പ്രതിദിനം ശരാശരി 7.25 ലക്ഷം സ്ത്രീകളാണ് സൗജന്യ യാത്രയുടെ പ്രയോജനം നേടുന്നത്.
ഇതുവരെ 1.87 കോടി വനിതകളാണ് പദ്ധതിയിലൂടെ യാത്ര ചെയ്തത്. തിരുവനന്തപുരം, കൊല്ലം ജില്ലകളിലാണ് ഏറ്റവും കൂടുതൽ യാത്രക്കാർ ഉണ്ടായത്. നിലവിൽ 3125 ഓർഡിനറി ബസുകളാണ് പ്രിയദർശിനി പദ്ധതിയുടെ ഭാഗമായി സർവീസ് നടത്തുന്നത്.
അതേസമയം, ഗവി പ്രിയദർശിനി ബസ് തുടർച്ചയായി ബ്രേക്ക് ഡൗൺ ആകുന്ന സംഭവത്തിൽ കെഎസ്ആർടിസി അന്വേഷണം ആരംഭിച്ചു. കെഎസ്ആർടിസി സിഎംഡി നിയോഗിച്ച സംഘം പത്തനംതിട്ടയിലെത്തി വിവരങ്ങൾ ശേഖരിച്ചു. വിജിലൻസ് വിഭാഗം ബസുകൾ പരിശോധിക്കുകയും അന്വേഷണ റിപ്പോർട്ട് ഉടൻ സിഎംഡിക്ക് കൈമാറുകയും ചെയ്യും.
കഴിഞ്ഞ ദിവസം ഗവിയിലേക്ക് സർവീസ് നടത്തിയിരുന്ന ബസ് കാറ്റാടിക്കുന്നിൽ വച്ച് ബ്രേക്ക് ഡൗൺ ആയിരുന്നു. തുടർച്ചയായ തകരാറുകൾ പരിഗണിച്ച് ഗവി ബസിലെ യാത്രക്കാരുടെ എണ്ണം 55 ആയി പരിമിതപ്പെടുത്തിയിട്ടുണ്ട്.
സ്ത്രീകൾക്ക് കെഎസ്ആർടിസി ഓർഡിനറി വിഭാഗം ബസുകളിൽ സൗജന്യ യാത്ര അനുവദിക്കുന്ന പദ്ധതിയാണ് പ്രിയദർശിനി. ഓർഡിനറി, സിറ്റി ഓർഡിനറി, ലിമിറ്റഡ് സ്റ്റോപ്പ്/ഓർഡിനറി, ടൗൺ ടു ടൗൺ, ഫെയർ സ്റ്റേജ് ലിമിറ്റഡ് സ്റ്റോപ്പ്, പോയിന്റ് ടു പോയിന്റ്/ഓർഡിനറി, ഗ്രാമവണ്ടി തുടങ്ങിയ സർവീസുകളിലാണ് സൗജന്യ യാത്ര ലഭിക്കുക.
എല്ലാ പ്രായത്തിലുള്ള സ്ത്രീകൾക്കും ട്രാൻസ്ജെൻഡർ വിഭാഗക്കാർക്കും പദ്ധതിയുടെ ആനുകൂല്യം ലഭിക്കും.
