തിരുവനന്തപുരം: സംസ്ഥാനത്ത് റാഗിംഗ് തടയുന്നതിനായി പ്രത്യേക നിയമം കൊണ്ടുവരുമെന്ന് സർക്കാർ അറിയിച്ചു. റാഗിംഗിനെതിരെ പരാതികൾ വേഗത്തിൽ സ്വീകരിക്കാനും നടപടികൾ ഉറപ്പാക്കാനുമായി റാഗിംഗിന് ഇരയായി മരിച്ച സിദ്ധാർത്ഥിന്റെ പേരിൽ പ്രത്യേക മൊബൈൽ ആപ്പ് പുറത്തിറക്കുമെന്നും അറിയിച്ചു.
മന്ത്രിസഭാ യോഗ തീരുമാനങ്ങൾ വിശദീകരിക്കുന്നതിനിടെയാണ് ഇക്കാര്യം അറിയിച്ചത്. വിദ്യാർത്ഥികൾക്ക് ആപ്പ് വഴി നേരിട്ട് പരാതി നൽകാൻ സൗകര്യമൊരുക്കുമെന്നും ലഭിക്കുന്ന പരാതികളിൽ കർശന നടപടി സ്വീകരിക്കുമെന്നും സർക്കാർ വ്യക്തമാക്കി.
വിദ്യാഭ്യാസ സ്ഥാപനങ്ങളിൽ റാഗിംഗ് പൂർണമായും തടയുക എന്ന ലക്ഷ്യത്തോടെയാണ് പുതിയ നിയമവും പരാതിനൽകൽ സംവിധാനവും നടപ്പാക്കുന്നതെന്ന് സർക്കാർ അറിയിച്ചു. വിദ്യാർത്ഥികളുടെ സുരക്ഷ ഉറപ്പാക്കുന്നതിനും റാഗിംഗ് സംഭവങ്ങളിൽ സമയബന്ധിത ഇടപെടൽ സാധ്യമാക്കുന്നതിനുമാണ് പുതിയ നടപടികൾ ലക്ഷ്യമിടുന്നത്.
