വാഷിങ്ടൺ: മാസങ്ങൾ പിന്നിട്ടിട്ടും അവസാനമില്ലാതെ തുടരുന്ന ഇറാൻ-യുഎസ് സംഘർഷത്തിന്റെ പ്രധാന കേന്ദ്രമായി മാറിയ ഹോർമുസ് കടലിടുക്കിൽ ഇറാന് മേൽക്കൈ നഷ്ടപ്പെടുന്നതായി റിപ്പോർട്ട്. കടലിടുക്കിന്റെ നിയന്ത്രണം തങ്ങൾക്കാണെന്ന് ഇരുരാജ്യങ്ങളും അവകാശപ്പെടുന്നതിനിടെയാണ് കപ്പൽ ഗതാഗതത്തിന്റെ പുതിയ വിവരങ്ങൾ യുഎസ് നാവികസേനയുടെ സ്വാധീനം വർധിക്കുന്നതായി സൂചിപ്പിക്കുന്നത്. കപ്പൽ ഗതാഗത വിവരങ്ങൾ ഉദ്ധരിച്ച് സിഎൻഎൻ ആണ് ഇക്കാര്യം റിപ്പോർട്ട് ചെയ്തത്.

കപ്പൽ യാത്രകൾ നിരീക്ഷിക്കുന്ന കെപ്ലർ എന്ന സ്ഥാപനത്തിന്റെ കണക്കുകൾ പ്രകാരം കഴിഞ്ഞ രണ്ടാഴ്ചയ്ക്കിടെ ഹോർമുസ് കടലിടുക്കിലൂടെ കടന്നുപോയ കപ്പലുകളിൽ 80 ശതമാനത്തിലേറെയും ഒമാന്റെ വടക്കൻ തീരത്തോട് ചേർന്നുള്ള കപ്പൽച്ചാലാണ് ഉപയോഗിച്ചത്. ഇറാൻ ശക്തമായി എതിർക്കുന്ന ഐക്യരാഷ്ട്രസഭ അംഗീകരിച്ച കപ്പൽച്ചാലാണിത്.

വാണിജ്യ കപ്പലുകളുടെ യാത്രാരേഖകൾ യുഎസ് നാവികസേന പരിശോധിക്കുകയും കപ്പലുകൾക്ക് സുരക്ഷിതമായ പാത ഉറപ്പാക്കുകയും ചെയ്യുന്നുണ്ടെന്നും റിപ്പോർട്ടിൽ പറയുന്നു. ഇറാന്റെ മുന്നറിയിപ്പുകൾ അവഗണിച്ച് യുഎസ് നാവികസേനയുടെ സംരക്ഷണത്തിലാണ് ഇപ്പോൾ ഭൂരിഭാഗം കപ്പലുകളും ഹോർമുസ് കടക്കുന്നതെന്നാണ് വിവരം.

ഇറാന്റെ നിയന്ത്രണത്തിലുള്ള ജലപാതയിലൂടെ സഞ്ചരിക്കാൻ ശ്രമിച്ച നിരവധി കപ്പലുകൾക്ക് നേരത്തെ ആക്രമണം നേരിട്ടിരുന്നു. എന്നാൽ കഴിഞ്ഞ ഏതാനും ആഴ്ചകളായി സ്ഥിതിഗതികളിൽ മാറ്റമുണ്ടായതായാണ് കപ്പൽ ഗതാഗത കണക്കുകൾ സൂചിപ്പിക്കുന്നത്. ഒരു മാസം മുമ്പ് വരെ ഒമാൻ ഭാഗത്തെ കപ്പൽച്ചാലിലൂടെയുള്ള ഗതാഗതം വളരെ കുറവായിരുന്നെങ്കിൽ ഇപ്പോൾ സ്ഥിതി നേരെ വിപരീതമാണ്. ഇറാൻ നിർദേശിക്കുന്ന പാതയിലൂടെയുള്ള കപ്പൽ ഗതാഗതം ഗണ്യമായി കുറഞ്ഞു.

“കടലിടുക്കിന്റെ നിയന്ത്രണം ഇറാന് ഭാഗികമായെങ്കിലും നഷ്ടപ്പെട്ടതായി കാണപ്പെടുന്നു” എന്നാണ് കെപ്ലറിലെ ക്രൂഡ് ഓയിൽ വിശകലന വിഭാഗം മേധാവി ഹോമായൂൺ ഫലക്ഷാഹി പ്രതികരിച്ചത്.

ഇറാന്റെ ആക്രമണങ്ങളിൽ നിന്ന് രക്ഷപ്പെടാൻ ചില കപ്പലുകൾ ട്രാൻസ്‌പോണ്ടറുകൾ ഓഫ് ചെയ്താണ് സഞ്ചരിക്കുന്നതെന്നും കെപ്ലർ പറയുന്നു. ഇതിലൂടെ കപ്പലുകളുടെ നീക്കം നിരീക്ഷിക്കുന്നത് ബുദ്ധിമുട്ടാക്കുകയാണ് ലക്ഷ്യം. അതേസമയം, ഹോർമുസിന് സമീപം യുഎസ് വിന്യസിച്ചിരിക്കുന്ന വലിയ സൈനിക സാന്നിധ്യം കടന്നുപോകുന്ന കപ്പലുകളുടെ നീക്കം നിരീക്ഷിക്കുന്നുണ്ട്. യുദ്ധത്തിന് തൊട്ടുമുമ്പുണ്ടായിരുന്ന നിലയോട് സാമ്യമുള്ള രീതിയിൽ കഴിഞ്ഞ ആഴ്ച ഹോർമുസിലൂടെ എണ്ണ കയറ്റുമതി നടന്നതായും യുഎസ് അവകാശപ്പെടുന്നു.

എന്നാൽ ലഭ്യമായ കണക്കുകൾക്കിടയിലും ഹോർമുസിന്റെ നിയന്ത്രണം സംബന്ധിച്ച അവകാശവാദങ്ങളിൽ ഇരുരാജ്യങ്ങളുടെയും നേതാക്കൾ ഉറച്ചുനിൽക്കുകയാണ്. ഹോർമുസ് കടലിടുക്ക് തുറന്നുതന്നെയാണെന്നും ഇറാനുമായി ഇനി ചർച്ചകൾക്കില്ലെന്നും യുഎസ് പ്രസിഡന്റ് ഡൊണാൾഡ് ട്രംപ് തിങ്കളാഴ്ച വ്യക്തമാക്കി.

അതേസമയം, ധാരണാപത്രത്തിലെ വ്യവസ്ഥകൾ യുഎസ് പാലിക്കുന്നതുവരെ ഹോർമുസിലൂടെയുള്ള കപ്പൽ ഗതാഗതത്തിന് നിയന്ത്രണം തുടരുമെന്നാണ് ഇറാനിയൻ പാർലമെന്റ് സ്പീക്കർ മുഹമ്മദ് ബാഗേർ ഘാലിബാഫ് വ്യക്തമാക്കിയത്. ഇരുരാജ്യങ്ങളുടെയും പരസ്പരവിരുദ്ധമായ അവകാശവാദങ്ങൾക്കിടെ ഹോർമുസിലെ കപ്പൽ ഗതാഗതമാണ് ഇപ്പോൾ സ്ഥിതിഗതികളുടെ നിർണായക സൂചികയായി മാറുന്നത്.