ന്യൂഡൽഹി: ദേശീയ വനിതാ കമ്മീഷൻ സംഘടിപ്പിച്ച ശിൽപശാലയിൽ പ്രതിഷേധവുമായി കേരളത്തിൽ നിന്നുള്ള യുഡിഎഫ് വനിതാ എംഎൽഎമാർ. വനിതാ കമ്മീഷനെ രാഷ്ട്രീയ അജണ്ട നടപ്പാക്കാൻ ഉപയോഗിക്കുന്നുവെന്ന് ആരോപിച്ചാണ് എംഎൽഎമാർ പ്രതിഷേധിച്ചത്. മുദ്രാവാക്യം വിളിച്ച ശേഷം ശിൽപശാല ബഹിഷ്കരിക്കുകയും ചെയ്തു.
സംഘപരിവാർ അജണ്ട നടപ്പാക്കാനാണ് ദേശീയ വനിതാ കമ്മീഷൻ ശ്രമിക്കുന്നതെന്ന് ഷാനിമോൾ ഉസ്മാൻ ആരോപിച്ചു. കേരളത്തിൽ നിന്നുള്ള മന്ത്രിമാരെ പരിപാടിയിൽ പ്രസംഗിക്കാൻ ക്ഷണിച്ചില്ലെന്നും അവർ പറഞ്ഞു. ശിൽപശാലയിലെ പ്രസംഗങ്ങളെല്ലാം ഹിന്ദിയിലായിരുന്നെന്നും മലയാളത്തിലേക്ക് വിവർത്തനം ചെയ്യാനുള്ള സംവിധാനവും ഉണ്ടായിരുന്നില്ലെന്നും ഷാനിമോൾ ഉസ്മാൻ ആരോപിച്ചു.
വനിതാ സംവരണ നിയമത്തിലെ ഭേദഗതിയെക്കുറിച്ച് ചോദിച്ചപ്പോൾ ഇവിടെ സംവാദമല്ല നടക്കുന്നതെന്നായിരുന്നു വനിതാ കമ്മീഷന്റെ മറുപടിയെന്ന് ബിന്ദു കൃഷ്ണ പറഞ്ഞു. കമ്മീഷന്റെ അജണ്ട നടപ്പാക്കാനാണ് ശ്രമിച്ചതെന്നും അവർ ആരോപിച്ചു.
എല്ലാവരെയും ഉൾക്കൊള്ളാൻ ദേശീയ വനിതാ കമ്മീഷൻ തയ്യാറായില്ലെന്ന് മന്ത്രി കെ.എ. തുളസി പറഞ്ഞു. നിരവധി തവണ കൈ ഉയർത്തിയിട്ടും കെ.കെ. രമയ്ക്ക് സംസാരിക്കാൻ അവസരം നൽകിയില്ലെന്നും അവർ ആരോപിച്ചു. എംഎൽഎമാർക്ക് ആവശ്യമായ പരിഗണന നൽകിയില്ലെന്ന് ഉമാ തോമസ് എംഎൽഎയും പറഞ്ഞു.
ഹിന്ദി പഠിപ്പിച്ചുതരാമെന്ന് പറഞ്ഞ് ഉത്തർപ്രദേശിൽ നിന്നുള്ള ഒരു എംഎൽഎ അധിക്ഷേപിച്ചെന്ന് വിദ്യാ ബാലകൃഷ്ണൻ ആരോപിച്ചു. ശിൽപശാല നിരാശാജനകമായ അനുഭവമായിരുന്നെന്ന് ഉഷാ വിജയൻ പ്രതികരിച്ചു. ഡൽഹിയിൽ എത്തിയിട്ട് പരിപാടിയിൽ നിന്ന് യാതൊരു പ്രയോജനവും ലഭിച്ചില്ലെന്നും എല്ലാം ഏകീകരിക്കാനുള്ള ശ്രമമാണെന്ന് സംശയിക്കുന്നതായും ഫാത്തിമ തഹ്ലിയ എംഎൽഎ പ്രതികരിച്ചു.
