തിരുവനന്തപുരം: പിഎസ്സി പരീക്ഷാ തട്ടിപ്പ് അന്വേഷണത്തിൽ ചോദ്യം ചെയ്യലിന് ഹാജരാകുന്നതിൽ പിഎസ്സി ചെയർമാനും അംഗങ്ങൾക്കും പ്രത്യേക പരിരക്ഷയില്ലെന്ന് മുഖ്യമന്ത്രി വി.ഡി. സതീശൻ. അന്വേഷണവുമായി പിഎസ്സി സഹകരിക്കണമെന്നും മുഖ്യമന്ത്രി വ്യക്തമാക്കി.
ക്രൈംബ്രാഞ്ച് ആസ്ഥാനത്ത് ചോദ്യം ചെയ്യലിന് ഹാജരാകില്ലെന്ന നിലപാടിലാണ് പിഎസ്സി. അന്വേഷണ ഉദ്യോഗസ്ഥർ പിഎസ്സി ആസ്ഥാനത്തെത്തി മൊഴിയെടുക്കണമെന്നാണ് കമ്മീഷന്റെ ആവശ്യം. എന്നാൽ ചോദ്യം ചെയ്യലിനായി ക്രൈംബ്രാഞ്ച് ആസ്ഥാനത്ത് എത്തണമെന്ന നിലപാടിലാണ് അന്വേഷണസംഘം.
ഗുരുതരമായ ആരോപണങ്ങളാണ് പിഎസ്സിക്കെതിരെ ഉയർന്നിരിക്കുന്നതെന്ന് മുഖ്യമന്ത്രി പറഞ്ഞു. അന്വേഷണവുമായി എല്ലാവരും സഹകരിക്കണം. പിഎസ്സി ചെയർമാൻ എന്നത് പ്രത്യേക പരിരക്ഷ ലഭിക്കുന്ന പദവിയല്ലെന്നും അദ്ദേഹം വ്യക്തമാക്കി.
ക്രിമിനൽ നടപടി ചട്ടപ്രകാരം കേസെടുത്തുള്ള അന്വേഷണത്തിൽ ചോദ്യം ചെയ്യേണ്ട സ്ഥലം തീരുമാനിക്കുന്നത് അന്വേഷണ ഉദ്യോഗസ്ഥന്റെ അധികാരപരിധിയിലാണെന്നാണ് ക്രൈംബ്രാഞ്ചിന്റെ നിലപാട്. പിഎസ്സിയുടെ എതിർപ്പ് സംബന്ധിച്ച് വിശദമായ നിയമോപദേശം തേടിയ ശേഷമായിരിക്കും തുടർനടപടികൾ.
അതേസമയം, കേസുമായി ബന്ധപ്പെട്ട് പിഎസ്സി ഉദ്യോഗസ്ഥരുടെ ചോദ്യം ചെയ്യൽ തുടരുകയാണ്. അന്വേഷണം തടസ്സപ്പെടാത്ത രീതിയിൽ മറ്റൊരു സ്ഥലത്ത് വെച്ച് മൊഴിയെടുക്കുന്നതുൾപ്പെടെയുള്ള സാധ്യതകളും പരിശോധിക്കുന്നുണ്ട്.
ചോദ്യം ചെയ്യലുമായി ബന്ധപ്പെട്ട തർക്കം തുടർന്നാൽ പിഎസ്സി ഹൈക്കോടതിയെ സമീപിക്കാനുള്ള സാധ്യതയും നിലനിൽക്കുന്നുണ്ട്.
