തിരുവനന്തപുരം: ആസൂത്രണ ബോർഡ് ചീഫ് തസ്തികയിലേക്കു നടന്ന പരീക്ഷയുടെ മൂല്യനിർണയത്തിൽ വീഴ്ച വരുത്തിയെന്ന പരാതിയിൽ പി.എസ്.സി അംഗങ്ങൾ മൊഴിയെടുപ്പിന് ഹാജരാകണമെന്ന് ക്രൈംബ്രാഞ്ച് എസ്ഐടി. നേരത്തേ നോട്ടിസ് നൽകിയ നാല് പി.എസ്.സി അംഗങ്ങൾക്കും സെക്രട്ടറിക്കും ക്രൈംബ്രാഞ്ച് എസ്.പി സക്കറിയ മാത്യു കത്ത് നൽകി.
ഔദ്യോഗിക തിരക്കുകൾക്ക് ശേഷം മൊഴിയെടുപ്പിന് ഹാജരാകാൻ കഴിയുന്ന സമയം അറിയിക്കണമെന്നും കത്തിൽ ആവശ്യപ്പെട്ടിട്ടുണ്ട്. മൊഴിയെടുക്കേണ്ട സ്ഥലം ക്രൈംബ്രാഞ്ച് തീരുമാനിക്കും.
ക്രൈംബ്രാഞ്ച് ആസ്ഥാനത്ത് ചോദ്യം ചെയ്യലിന് എത്താൻ കഴിയില്ലെന്ന് പ്രോട്ടോക്കോൾ ചൂണ്ടിക്കാട്ടി പി.എസ്.സി സെക്രട്ടറിയും അംഗങ്ങളും നേരത്തെ അന്വേഷണ സംഘത്തെ അറിയിച്ചിരുന്നു. എന്നാൽ അന്വേഷണത്തിന്റെ ഭാഗമായി സാക്ഷികളെന്ന നിലയിൽ മൊഴി നൽകാൻ ഹാജരാകുന്നതിൽ പി.എസ്.സി അംഗങ്ങൾക്ക് പ്രത്യേക പരിരക്ഷയില്ലെന്ന് ക്രൈംബ്രാഞ്ച് എസ്.പി മറുപടിയിൽ വ്യക്തമാക്കി.
അതേസമയം, ക്രൈംബ്രാഞ്ചിന്റെ നടപടിക്കെതിരെ ഹൈക്കോടതിയെ സമീപിക്കുന്നതും പി.എസ്.സി ആലോചിക്കുന്നുണ്ട്. പി.എസ്.സി അംഗങ്ങളായ എസ്.എ. സെയ്ഫ്, എസ്. ശ്രീകുമാർ, സി.കെ. ഷാജിബ്, സ്റ്റാനി തോമസ് എന്നിവർക്കാണ് ക്രൈംബ്രാഞ്ച് നേരത്തെ നോട്ടിസ് നൽകിയത്.
