തൃശൂർ: മുഖ്യമന്ത്രിയുടെ സ്പോൺസർ ചെയ്ത വിമാനയാത്രയുമായി ബന്ധപ്പെട്ട വിവാദത്തിൽ പ്രതികരണവുമായി മന്ത്രി കെ. മുരളീധരൻ. ഇതേ കമ്പനിയുടെ വിമാനം പിണറായി വിജയൻ ഉപയോഗിച്ചിട്ടുണ്ടെന്നും കാലം മാറുന്നതിനനുസരിച്ച് മുഖ്യമന്ത്രിയുടെ യാത്രകളിലും മാറ്റം വേണമെന്നും മുരളീധരൻ പറഞ്ഞു.

കരിവണ്ടി മാറി വന്ദേഭാരത് വന്നതുപോലെ യാത്രാ രീതികളിലും മാറ്റം സ്വാഭാവികമാണെന്ന് അദ്ദേഹം പറഞ്ഞു. സ്പോൺസർ ആരാണെന്ന് മാധ്യമങ്ങൾക്ക് നന്നായി അറിയാമെന്നും മുഖ്യമന്ത്രി തന്നെ ഇക്കാര്യം വെളിപ്പെടുത്തുമെന്നും മുരളീധരൻ വ്യക്തമാക്കി. തനിക്ക് നിലവിൽ ഇത്തരമൊരു വിമാനയാത്ര നടത്തേണ്ട സാഹചര്യമില്ലെന്നും അദ്ദേഹം തൃശൂരിൽ പറഞ്ഞു.

ശബരിമലയിലെ സ്വർണ കിരീടം അവിടെ തന്നെയുണ്ടെന്നാണ് ദേവസ്വം ബോർഡ് അറിയിച്ചതെന്ന് മുരളീധരൻ പറഞ്ഞു. ശബരിമലയുടെ കാര്യങ്ങൾ പരിശോധിക്കുന്നതിനായി എഡിഎമ്മിനെ ചുമതലപ്പെടുത്തിയിട്ടുണ്ട്. അദ്ദേഹം സ്ഥലത്തെത്തി വിശദമായ പരിശോധന നടത്തി റിപ്പോർട്ട് സമർപ്പിക്കും. റിപ്പോർട്ടിന്റെ അടിസ്ഥാനത്തിൽ തുടർനടപടികൾ സ്വീകരിക്കുമെന്നും മന്ത്രി വ്യക്തമാക്കി.

മുറുക്കി പിടിക്കേണ്ട കാര്യങ്ങളിൽ ശക്തമായ നിലപാട് സ്വീകരിക്കുമെന്നും അദ്ദേഹം പറഞ്ഞു. ശബരിമല വിഷയത്തിൽ മുഖ്യമന്ത്രി തനിക്ക് പ്രത്യേക നിർദേശങ്ങളൊന്നും നൽകിയിട്ടില്ലെന്നും മുരളീധരൻ വ്യക്തമാക്കി. ശബരിമലയിൽ പണത്തിന് യാതൊരു ക്ഷാമവുമില്ലെന്നും അദ്ദേഹം കൂട്ടിച്ചേർത്തു.

സംസ്ഥാനത്തെ സർക്കാർ ആശുപത്രികളിലെ മരുന്ന് ക്ഷാമവുമായി ബന്ധപ്പെട്ട റിപ്പോർട്ടുകളെയും മന്ത്രി തള്ളി. 657 ഇനം മരുന്നുകൾ ആശുപത്രികളിൽ സ്റ്റോക്കുണ്ടെന്നാണ് മുരളീധരന്റെ അവകാശവാദം. സർക്കാർ ആശുപത്രികളിൽ മരുന്ന് ക്ഷാമമില്ലെന്നും ചിലർ ബ്ലാക്ക് സ്റ്റോൺ ഏജന്റുമാരായി പ്രവർത്തിക്കുകയാണെന്നും അദ്ദേഹം ആരോപിച്ചു.

മരുന്ന് ക്ഷാമമുണ്ടെന്ന ആരോപണങ്ങൾക്കെതിരെ പരിഹാസരൂപത്തിലുള്ള പരാമർശവും മന്ത്രി നടത്തി. വിഷയത്തിൽ സർക്കാരിന്റെ നിലപാട് വ്യക്തമാക്കുന്നതിനിടെയാണ് കെ. മുരളീധരന്റെ പ്രതികരണം.