ന്യൂഡൽഹി: പശ്ചിമബംഗാൾ മുൻമുഖ്യമന്ത്രി മമതാ ബാനർജിക്ക് തിരിച്ചടി. ടിഎംസിയുടെ മരവിപ്പിച്ച നാല് ബാങ്ക് അക്കൗണ്ടുകൾ ഉപയോഗിക്കാൻ അനുവദിക്കണമെന്നാവശ്യപ്പെട്ട് സമർപ്പിച്ച ഹർജിയിൽ ഇടപെടാൻ സുപ്രീം കോടതി വിസമ്മതിച്ചു. ഭൂമി വിതരണവുമായി ബന്ധപ്പെട്ട തട്ടിപ്പ് കേസിലാണ് പശ്ചിമബംഗാൾ പൊലീസ് നാല് ബാങ്ക് അക്കൗണ്ടുകൾ മരവിപ്പിച്ചത്. ഏകദേശം 440 കോടി രൂപയാണ് നാല് അക്കൗണ്ടുകളിലായി ഉള്ളതെന്നാണ് വിവരം.

വിഷയം കൽക്കട്ട ഹൈക്കോടതിയുടെ പരിഗണനയിലാണെന്ന് ചൂണ്ടിക്കാട്ടിയാണ് സുപ്രീം കോടതി ഹർജിയിൽ ഇടപെടാൻ വിസമ്മതിച്ചത്. കേസ് പരിഗണിച്ച കൽക്കട്ട ഹൈക്കോടതി തുടർവാദം പൂജാ അവധിക്ക് ശേഷം കേൾക്കുന്നതിനായി മാറ്റിവച്ചിരിക്കുകയാണ്.

വിഷയം ഹൈക്കോടതിയുടെ പരിഗണനയിലായതിനാൽ കേസിന്റെ മെറിറ്റിലേക്ക് കടക്കാൻ താൽപര്യമില്ലെന്ന് ജസ്റ്റിസുമാരായ എം.എം. സുന്ദരേഷ്, പി.ബി. വരാലെ എന്നിവരടങ്ങിയ ബെഞ്ച് വ്യക്തമാക്കി.

ബാങ്ക് അക്കൗണ്ടുകൾ മരവിപ്പിച്ച നടപടി രാഷ്ട്രീയ പാർട്ടിയുടെ പ്രവർത്തനത്തെ തടസ്സപ്പെടുത്തുമെന്ന് മമതാ ബാനർജിക്കുവേണ്ടി ഹാജരായ മുതിർന്ന അഭിഭാഷകൻ അഭിഷേക് മനു സിങ്‌വി വാദിച്ചു. എന്നാൽ ടിഎംസിയിലെ രണ്ട് വിഭാഗങ്ങൾ തമ്മിലുള്ള തർക്കം ചൂണ്ടിക്കാട്ടിയാണ് പശ്ചിമബംഗാൾ സർക്കാരിനും പൊലീസിനും വേണ്ടി ഹാജരായ സോളിസിറ്റർ ജനറൽ തുഷാർ മേത്ത ഇതിനെ എതിർത്തത്.

ഏതാണ് യഥാർഥ ടിഎംസിയെന്ന വിഷയം നിലവിൽ തെരഞ്ഞെടുപ്പ് കമ്മിഷന്റെ പരിഗണനയിലാണെന്നും തുഷാർ മേത്ത കോടതിയെ അറിയിച്ചു.