ന്യൂഡൽഹി: ആഗോള ഭക്ഷ്യവില നാല് വർഷത്തിനിടയിലെ ഏറ്റവും ഉയർന്ന നിലയിലെത്തി. കാലാവസ്ഥാ പ്രതിസന്ധിയും വിവിധ മേഖലകളിലെ വിതരണ-ഗതാഗത തടസ്സങ്ങളും ഭക്ഷ്യവിപണിയിൽ സമ്മർദം ശക്തമാക്കിയതായി ഐക്യരാഷ്ട്രസഭയുടെ ഭക്ഷ്യ-കാർഷിക സംഘടന (FAO) അറിയിച്ചു.
FAOയുടെ ഭക്ഷ്യവില സൂചിക സെപ്റ്റംബറിൽ ശരാശരി 136.0 പോയിന്റായി ഉയർന്നു. ഓഗസ്റ്റിലെ പുതുക്കിയ 134.0 പോയിന്റിൽ നിന്നാണ് വർധന. 2022 നവംബറിന് ശേഷമുള്ള ഏറ്റവും ഉയർന്ന നിരക്കാണിത്.
ഹോർമൂസ് കടലിടുക്കിലെയും കരിങ്കടലിലെയും ഗതാഗത തടസ്സങ്ങൾക്കൊപ്പം പ്രതികൂല കാലാവസ്ഥയും ഭക്ഷ്യവില ഉയരാൻ കാരണമായി. നിലവിലെ സമ്മർദങ്ങൾ തുടർന്നാൽ ഭക്ഷ്യ-ഊർജ ഇറക്കുമതിയെ കൂടുതലായി ആശ്രയിക്കുന്ന രാജ്യങ്ങളിൽ വിലക്കയറ്റം രൂക്ഷമാകാൻ സാധ്യതയുണ്ടെന്ന് FAO ചീഫ് ഇക്കണോമിസ്റ്റ് മാക്സിമോ ടൊറേറോ പറഞ്ഞു.
പ്രധാന ഭക്ഷ്യവിഭവങ്ങളിൽ ഏറ്റവും വലിയ വിലവർധന രേഖപ്പെടുത്തിയത് പഞ്ചസാരയ്ക്കാണ്. സെപ്റ്റംബറിൽ പഞ്ചസാര വില സൂചിക 6.1 ശതമാനം ഉയർന്നു. തുടർച്ചയായ മൂന്നാം മാസമാണ് പഞ്ചസാര വില വർധിക്കുന്നത്. ഇതോടെ അന്താരാഷ്ട്ര വിപണിയിലെ പഞ്ചസാര വില 18 മാസത്തെ ഉയർന്ന നിലയിലെത്തി.
പ്രധാന പഞ്ചസാര ഉൽപ്പാദന മേഖലകളിലെ പ്രതികൂല കാലാവസ്ഥയും വിതരണത്തെക്കുറിച്ചുള്ള ആശങ്കകളുമാണ് വില ഉയരാൻ പ്രധാന കാരണം. എൽ നിനോ പ്രതിഭാസവുമായി ബന്ധപ്പെട്ട കാലാവസ്ഥാ ആശങ്കകളും ഉൽപ്പാദനത്തെ ബാധിക്കുമെന്ന ഭീതിയുണ്ട്.
സെപ്റ്റംബറിൽ ധാന്യവില സൂചിക പ്രതിമാസ അടിസ്ഥാനത്തിൽ 5.1 ശതമാനം ഉയർന്നു. അമേരിക്കയിലെ ചോളം ഉൽപ്പാദനത്തിലെ കുറവും കരിങ്കടൽ മേഖലയിലെ ധാന്യ കയറ്റുമതിയിലുണ്ടായ തടസ്സങ്ങളുമാണ് വിലവർധനയ്ക്ക് കാരണമായത്.
പാം ഓയിൽ വില ഉയർന്നതിനെ തുടർന്ന് സസ്യ എണ്ണയുടെ വിലയും 0.9 ശതമാനം വർധിച്ചു. ശക്തമായ ആവശ്യകതയ്ക്കൊപ്പം പ്രതികൂല കാലാവസ്ഥ ഉൽപ്പാദനത്തെ ബാധിച്ചേക്കുമെന്ന ആശങ്കയും വില ഉയരാൻ കാരണമായി.
അതേസമയം, എല്ലാ ഭക്ഷ്യവിഭവങ്ങൾക്കും വില ഉയർന്നില്ല. മാംസവില സൂചിക 1.1 ശതമാനം കുറഞ്ഞു. കോഴിയിറച്ചിയുടെ വിലയിലുണ്ടായ ഇടിവും യൂറോപ്യൻ യൂണിയനിലെ പുതിയ ഇറക്കുമതി നിയമങ്ങളെ തുടർന്ന് ആവശ്യകത കുറഞ്ഞതുമാണ് മാംസവില കുറയാൻ കാരണമായത്.
