തൂത്തുക്കുടി: സംസ്ഥാനപാതയിലെ സൂചനാ ബോർഡിൽ ഹിന്ദിയിൽ സ്ഥലപ്പേര് രേഖപ്പെടുത്തിയതിനെതിരെ പ്രതിഷേധം ശക്തമായതോടെ നടപടിയുമായി തമിഴ്നാട് സർക്കാർ. സംഭവത്തിൽ ദേശീയപാത വിഭാഗത്തിലെ രണ്ട് ഉദ്യോഗസ്ഥരെ വെള്ളിയാഴ്ച സസ്പെൻഡ് ചെയ്തു.
ആൾവാർതിരുനഗരി–വള്ളിയൂർ സംസ്ഥാനപാത 93-ലെ സൂചനാ ബോർഡിലാണ് തമിഴിനും ഇംഗ്ലീഷിനുമൊപ്പം ഹിന്ദിയിൽ സ്ഥലപ്പേര് രേഖപ്പെടുത്തിയിരുന്നത്. പ്രതിഷേധം ഉയർന്നതിന് പിന്നാലെ ബോർഡിലെ ഹിന്ദി എഴുത്ത് അധികൃതർ നീക്കം ചെയ്തു.
തമിഴ്നാടിന്റെ ദ്വിഭാഷാ നയത്തിന് വിരുദ്ധമായ നടപടിയായതിനാലാണ് ഉദ്യോഗസ്ഥർക്കെതിരെ അച്ചടക്ക നടപടി ആരംഭിച്ചതെന്ന് ഇൻഫർമേഷൻ ആൻഡ് പബ്ലിക് റിലേഷൻസ് ഡയറക്ടർ പുറത്തിറക്കിയ പ്രസ്താവനയിൽ അറിയിച്ചു. ദ്വിഭാഷാ നയം ലംഘിക്കുന്ന ഉദ്യോഗസ്ഥർക്കെതിരെ കർശന നടപടി സ്വീകരിക്കുമെന്നും പ്രസ്താവനയിൽ വ്യക്തമാക്കി.
സാത്തൻകുളം വഴി കടന്നുപോകുന്ന റോഡ് സെൻട്രൽ റോഡ് ഇൻഫ്രാസ്ട്രക്ചർ ഫണ്ട് ഉപയോഗിച്ചാണ് ദേശീയപാത വിഭാഗം നവീകരിച്ചത്. നിർമാണം പൂർത്തിയായതിന് പിന്നാലെ തമിഴ്, ഹിന്ദി, ഇംഗ്ലീഷ് ഭാഷകളിൽ സൂചനാ ബോർഡ് സ്ഥാപിച്ചതോടെയാണ് സംഭവം വിവാദമായത്. ബോർഡിന്റെ ചിത്രം സമൂഹമാധ്യമങ്ങളിൽ വ്യാപകമായി പ്രചരിച്ചതും പ്രതിഷേധത്തിന് കാരണമായി.
2017ൽ ദേശീയപാതാ അതോറിറ്റി ഓഫ് ഇന്ത്യ (NHAI) സൈൻബോർഡുകളിൽ ഹിന്ദി ഉൾപ്പെടുത്താനുള്ള നീക്കം നടത്തിയപ്പോഴും തമിഴ്നാട്ടിൽ വ്യാപക പ്രതിഷേധം ഉയർന്നിരുന്നു. തുടർന്ന് സംസ്ഥാനത്തെ പല ബോർഡുകളിലും തമിഴും ഇംഗ്ലീഷും മാത്രമാണ് ഉപയോഗിച്ചിരുന്നത്.
സംഭവത്തിൽ മുൻ മുഖ്യമന്ത്രി എം.കെ. സ്റ്റാലിനും വിമർശനവുമായി രംഗത്തെത്തി. തമിഴ്നാടിന്റെ ദ്വിഭാഷാ നയം തുടർന്നും സംരക്ഷിക്കണമെന്ന നിലപാടാണ് അദ്ദേഹം സമൂഹമാധ്യമത്തിലൂടെ വ്യക്തമാക്കിയത്. 1968 മുതൽ തമിഴ്നാട് തമിഴിനും ഇംഗ്ലീഷിനും പ്രാധാന്യം നൽകുന്ന ദ്വിഭാഷാ നയം പിന്തുടരുന്നുണ്ട്.
