ചെന്നൈ: തമിഴ്‌നാട് രാഷ്ട്രീയത്തിൽ പുതിയ നീക്കവുമായി നടൻ വിജയ് നേതൃത്വം നൽകുന്ന തമിഴക വെട്രി കഴകം (ടിവികെ). ചെന്നൈ സത്യമൂർത്തി ഭവനിൽ ശനിയാഴ്ച നടന്ന പ്രതിപക്ഷ പാർട്ടികളുടെ ഇന്ത്യ മുന്നണി കൺസൾട്ടേറ്റീവ് യോഗത്തിൽ ടിവികെ പ്രതിനിധികൾ ആദ്യമായി പങ്കെടുത്തു. വോട്ടർ പട്ടികയിലെ തിരുത്തലുകളുമായി ബന്ധപ്പെട്ട് തിരഞ്ഞെടുപ്പ് കമ്മീഷനെതിരെ പ്രതിഷേധ പരിപാടികൾ ആസൂത്രണം ചെയ്യുന്നതിനായാണ് യോഗം ചേർന്നത്.
ടിവികെ ഇലക്ഷൻ വിഭാഗം ജനറൽ സെക്രട്ടറി ആധവ് അർജ്ജുന, ധനമന്ത്രി മരിയ വിൽസൺ എന്നിവരാണ് യോഗത്തിൽ പാർട്ടിയെ പ്രതിനിധീകരിച്ചത്. വിജയിയുടെ നേതൃത്വത്തിൽ സെപ്റ്റംബറിൽ രൂപീകരിച്ച സെക്യുലർ സോഷ്യൽ ജസ്റ്റിസ് വിക്ടറി അലയൻസ് തമിഴ്‌നാട്ടിലെ ഇന്ത്യ മുന്നണിയുടെ ഭാഗമാണെന്നും അതിന്റെ അടിസ്ഥാനത്തിലാണ് യോഗത്തിൽ പങ്കെടുത്തതെന്നും ടിവികെ ദേശീയ വക്താവ് ഫെലിക്സ് ജെറാൾഡ് പറഞ്ഞു. കോൺഗ്രസ്, വിസികെ, എംഡിഎംകെ, മുസ്ലീം ലീഗ് തുടങ്ങിയ പാർട്ടികളുടെ മുതിർന്ന നേതാക്കളും യോഗത്തിൽ പങ്കെടുത്തു.
ചീഫ് ഇലക്ഷൻ കമ്മീഷണർ ജ്ഞാനേഷ് കുമാറിനെതിരെയും കേന്ദ്ര തിരഞ്ഞെടുപ്പ് കമ്മീഷന്റെ സ്വയംഭരണവുമായി ബന്ധപ്പെട്ടും യോഗത്തിൽ വിമർശനം ഉയർന്നു. ബിജെപിക്കെതിരായ വിശാല രാഷ്ട്രീയ നീക്കത്തിൽ ഡിഎംകെയും ടിവികെയും ഒരുമിച്ച് നിൽക്കണമെന്ന് സിപിഐ സംസ്ഥാന സെക്രട്ടറി വിരപാണ്ഡ്യനും നേരത്തെ ആവശ്യപ്പെട്ടിരുന്നു. നിയമസഭാ തിരഞ്ഞെടുപ്പ് അടുത്തിരിക്കെ ടിവികെ ഇന്ത്യ മുന്നണി യോഗത്തിൽ പങ്കെടുത്തത് തമിഴ്‌നാട് രാഷ്ട്രീയത്തിൽ ശ്രദ്ധേയമായ നീക്കമായാണ് വിലയിരുത്തപ്പെടുന്നത്.
