ന്യൂഡൽഹി: ഗ്രേറ്റ് നിക്കോബാർ ദ്വീപിലെ വികസനപദ്ധതികൾക്കെതിരെ കൊൽക്കത്ത ഹൈക്കോടതിയിൽ നടക്കുന്ന നടപടികൾ നിർത്തിവെക്കണമെന്ന കേന്ദ്രസർക്കാരിന്റെ ആവശ്യം സുപ്രീം കോടതി തള്ളി. ഗോത്രവിഭാഗങ്ങളുടെ സംസ്കാരം സംരക്ഷിക്കുന്നത് മൗലികാവകാശങ്ങളുടെ പരിധിയിൽ വരുന്നതാണെന്ന് നിരീക്ഷിച്ച കോടതി, ഹർജിയിലെ വിഷയങ്ങൾ കാലതാമസമില്ലാതെ പരിഗണിച്ച് ഉചിതമായ തീരുമാനമെടുക്കാൻ കൊൽക്കത്ത ഹൈക്കോടതിയോട് നിർദേശിച്ചു.

ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചാണ് തിങ്കളാഴ്ച കേസ് പരിഗണിച്ചത്. ജസ്റ്റിസുമാരായ ജോയ് മാല ബാഗ്ചി, വി. മോഹന എന്നിവരാണ് ബെഞ്ചിലെ മറ്റ് അംഗങ്ങൾ. പരിസ്ഥിതി മന്ത്രാലയത്തിന്റെ മുൻ സെക്രട്ടറി മീന ഗുപ്ത സമർപ്പിച്ച ഹർജിയിലാണ് കൊൽക്കത്ത ഹൈക്കോടതി വാദം കേൾക്കുന്നത്.

ഗ്രേറ്റ് നിക്കോബാറിലെ 130 ചതുരശ്ര കിലോമീറ്ററിലധികം വരുന്ന വനമേഖലയെ പദ്ധതി ബാധിക്കുമെന്നും ഇത് 2006ലെ വനനിയമത്തിന്റെ ലംഘനമാണെന്നും ഹർജിയിൽ ചൂണ്ടിക്കാട്ടുന്നു. ഷോംപെൻ, നിക്കോബറീസ് ഗോത്രവിഭാഗങ്ങളുടെ ജീവിതരീതിയെയും സംസ്കാരത്തെയും പദ്ധതി പ്രതികൂലമായി ബാധിക്കുമെന്നും ഹർജിയിൽ ആരോപിക്കുന്നു.

72,000 കോടി രൂപയിലേറെ ചെലവ് പ്രതീക്ഷിക്കുന്ന പദ്ധതിയിൽ കണ്ടെയ്നർ ടെർമിനൽ ഉൾപ്പെടെയുള്ള വികസന പ്രവർത്തനങ്ങളാണുള്ളത്. പദ്ധതി തന്ത്രപ്രധാനവും ദേശീയതലത്തിൽ ഏറെ പ്രാധാന്യമുള്ളതുമാണെന്ന് കേന്ദ്രസർക്കാരിനുവേണ്ടി ഹാജരായ അറ്റോർണി ജനറൽ ആർ. വെങ്കിട്ടരമണിയും അഡീഷണൽ സോളിസിറ്റർ ജനറൽ ഐശ്വര്യ ഭാട്ടിയും വാദിച്ചു. പദ്ധതി നടപ്പാക്കുന്നതിലൂടെ ഷോംപെൻ ഉൾപ്പെടെയുള്ള തദ്ദേശീയ ഗോത്രവിഭാഗങ്ങൾക്ക് താമസസ്ഥലം നഷ്ടപ്പെടില്ലെന്നും അറ്റോർണി ജനറൽ വ്യക്തമാക്കി.

അതേസമയം, സുരക്ഷാ താൽപര്യവും വാണിജ്യ താൽപര്യവും തമ്മിൽ വേർതിരിവ് വേണമെന്ന് ജസ്റ്റിസ് ജോയ് മാല ബാഗ്ചി നിരീക്ഷിച്ചു. സംസ്കാര സംരക്ഷണം ഭരണഘടനാപരമായ മൗലികാവകാശമാണെന്നും നിക്കോബാർ പരിസ്ഥിതിയിലെ ഗോത്രസംസ്കാരത്തിന് ഭരണഘടനാപരമായ സംരക്ഷണം ആവശ്യമാണെന്നും അദ്ദേഹം വ്യക്തമാക്കി.

പദ്ധതിയുമായി ബന്ധപ്പെട്ട ആശങ്കകൾ ദേശീയ ഹരിത ട്രൈബ്യൂണൽ രണ്ടുതവണ പരിഗണിച്ച് തീർപ്പാക്കിയതാണെന്ന് കേന്ദ്രം സുപ്രീം കോടതിയെ അറിയിച്ചു. ചില നിബന്ധനകൾക്കും പാരിസ്ഥിതിക പ്രശ്നങ്ങൾ പഠിക്കുന്നതിനായി ഉന്നതതല സമിതി രൂപീകരിക്കുന്നതിനും വിധേയമായി നിക്കോബാർ പദ്ധതിയുടെ പാരിസ്ഥിതിക അനുമതി ട്രൈബ്യൂണൽ ശരിവെച്ചിരുന്നു. അനുമതി പുനഃപരിശോധിക്കണമെന്നാവശ്യപ്പെട്ടുള്ള ഹർജി 2023ൽ ഹരിത ട്രൈബ്യൂണൽ തള്ളിയതായും കേന്ദ്രം ചൂണ്ടിക്കാട്ടി.

പദ്ധതിയുണ്ടാക്കാനിടയുള്ള പാരിസ്ഥിതിക പ്രത്യാഘാതങ്ങൾ ചൂണ്ടിക്കാട്ടിയാണ് മീന ഗുപ്ത കൊൽക്കത്ത ഹൈക്കോടതിയെ സമീപിച്ചത്. ഹർജി നൽകാനുള്ള മീന ഗുപ്തയുടെ അവകാശത്തെ കേന്ദ്രം ചോദ്യം ചെയ്തെങ്കിലും ഹൈക്കോടതി ഈ എതിർപ്പ് തള്ളുകയായിരുന്നു. ഗോത്ര കൗൺസിലുകളെയും കേസിൽ കക്ഷി ചേർത്തിട്ടുള്ളതിനാൽ കേന്ദ്രത്തിന്റെ വാദത്തിന് നിലനിൽപ്പില്ലെന്ന് മീന ഗുപ്തയ്ക്കുവേണ്ടി ഹാജരായ അഭിഭാഷകൻ എസ്. മുരളീധർ സുപ്രീം കോടതിയിൽ വ്യക്തമാക്കി.

ഷോംപെൻ വിഭാഗം പ്രത്യേക സംരക്ഷിത വിഭാഗമല്ലെന്ന് ആർ. വെങ്കിട്ടരമണി വാദിച്ചപ്പോൾ, ഷോംപെൻ ജനതയ്ക്ക് പ്രത്യേക സംരക്ഷണം നൽകിയിട്ടുണ്ടെന്ന് ഹർജിക്കാരുടെ ഭാഗം ചൂണ്ടിക്കാട്ടി. ഷോംപെൻ, നിക്കോബറീസ് വിഭാഗങ്ങളെയാണ് പദ്ധതിയുടെ പ്രത്യാഘാതങ്ങൾ ബാധിക്കാൻ സാധ്യതയുള്ളത്.

ദേശീയ ഹരിത ട്രൈബ്യൂണലിന്റെ മുൻകാല ഉത്തരവുകൾക്ക് നിയമപരമായ നിർബന്ധിത സ്വഭാവമില്ലെങ്കിലും അവയുടെ പ്രാധാന്യം പരിഗണിക്കാമെന്ന് സുപ്രീം കോടതി വ്യക്തമാക്കി. ബന്ധപ്പെട്ട രേഖകൾ കേന്ദ്രത്തിന് ഹൈക്കോടതിയിൽ ഹാജരാക്കാമെന്നും കോടതി പറഞ്ഞു.

ഹർജിയുടെ നിലനിൽപ്പ് സംബന്ധിച്ച വാദം ഹൈക്കോടതിയിൽ തുടരാൻ അനുവദിക്കണമെന്ന കേന്ദ്രത്തിന്റെ ആവശ്യം സുപ്രീം കോടതി അംഗീകരിച്ചില്ല. എല്ലാ ഹർജികളും പരിഗണിച്ച് കാലതാമസമില്ലാതെ തീർപ്പാക്കാൻ കൊൽക്കത്ത ഹൈക്കോടതി ചീഫ് ജസ്റ്റിസിനോട് സുപ്രീം കോടതി നിർദേശിച്ചു. കേസിൽ വിശദമായ വാദം നവംബർ 25, 26 തീയതികളിൽ കൊൽക്കത്ത ഹൈക്കോടതി പരിഗണിക്കും.